Fraccion di AVP a adverti gobierno y partidonan MEP y RAIZ, cu e medidanan den Belasting Plan 2023 ta bay causa mas pobresa; cu nan lo pone specialmente companianan mediano y chikito bou hopi pression financiero y cu peliger cu nan lo mester sera nan negoshi; cu ora negoshinan sera hende lo perde trabou y cu e medidanan nobo aki di MEP y RAIZ lo haci Aruba menos atractivo pa turistanan y inversionistanan.
Lider di fraccion di AVP, mr. Mike Eman a mustra cu cifranan oficial di departamentonan di gobierno mes, cu specialmente e mas cu 50 mil hende cu ta gana un salario entre minimumloon y Afl. 3000 florin pa luna, e pensionadonan cu un pensioen di SVb, e trahadonan cu ta traha riba nan mes y e ciudadanonan cu ta haña un onderstand, tur lo bay ainda mas atras den nan forsa di compra!
E Lider di fraccion di AVP, mr. Mike Eman a calcula cu ta mas cu 50.000 hende lo wordo severamente perhudica door di e medidanan aki di Gabinete Wever Croes sosteni pa fraccionan di MEP y RAIZ.
Pa preveni esaki fraccion di AVP a presenta un amienda hopi elabora pa cambia e medidanan di Gabinete Wever-Croes den un dirección cu lo evita mas pobresa y trece alivio pa pueblo. E amienda di e fraccion di AVP ta accentua e derecho riba bestaanszekerheid y ta ensera e siguiente elementonan essencial pa sigura e entrada basico (bestaansminimum) pa e grupo grandi di ciudadanonan cu un entrada abou:
- Ta propone pa Parlamento kita e plan den e ley pa impone e medida di un salario ficticio pa directornan di companianan chikito pasobra esaki ta stroba desaroyo di companianan mediano y chikito cu ta forma majoria di e companianan na Aruba y ta pone hopi di e companianan aki den peliger di sera porta pasobra nan no por cumpli cu e medida aki.
- Ta propone pa mantene e facilidad pa companianan mediano y chikito (KOR) cu ta haci posibel pa companianan cu un entrada bou di 84.000 florin pa no mester paga BBO, BAVP y BAZV.
- Ta propone pa aumenta e reparatietoeslag pa trahadonan cu un salario minimo, pa huerfanonan y viudanan pensiona y aumenta gehandicaptenuitkering cu 300 florin pa luna; pa introduci reparatietoeslag tambe pa empleadonan cu un entrada di 3000 florin pa luna. Tambe den un moción Fraccion di AVP a urgi Gabinete Wever Croes pa ehecuta e ley di iniciativa di Eman/Wyatt Ras pa duna majornan cu un mucha cu limitación bao di 16 anja tambe derecho riba gehandicaptenuitkering.
Fraccionnan di MEP y RAIZ a rechasa e amienda proponi door di AVP cu tabata tin como meta pa cuida e entrada di pensionadonan, viudanan pensiona, huerfanonan y trahadonan cu un entrada bou di 3000 florin y tambe esnan cu limitacion. Pero tambe e companianan mediano y chikito cu ta duna trabou na miles di trahado na Aruba.