Fin di siman venidero lo tin diferente actividad, GLW foundation ta organizando un fundraising event cu meta yuda dos pareha di 85 y 84 aña di edad cu 3 siman pasa riba diabierna a perde nan cas den un candela cu a kima tur cos.
GLW foundation ta un fundacion di competencianan di bellesa aki na Aruba cu ta cay bou di George Winterdal cu a conta mas tocante un otro fundraising event cu GLW foundation lo ta organizando e fin di siman venidero.
Fundacion GLW ta haci diferente fundraising event pa personanan cu no por recauda fondo riba nan mes. Nan ta ofrece e oportunidad di por haya ayudo door di acudi na publico por medio di nan fundacion. Mescos cu e caso di e parehanan aki cu tambe a conta nan nececidad pa un ayudo como cu nan ta di edad halto y tambe poco tempo pasa un a opera su rudia y ta hopi agradecido na e persona cu normalmente ta pasa cerca nan pa check pa yuda nan sali for di nan cas ora cu e candela a cuminsa. Tambe a ser menciona con e caso aki ta toca nan di cerca como cu e aña aki nan prome finalista ta nieta di e pareha aki.
Diadomingo awor 1 di October na Centro di Bario Tanki Leendert nan lo tin e fundraising event aki pa famia Bedoya cu lo cuminsa desde 10’or di mainta cu benta di snacks, pan, snacks box, cake box y pa 12’or lo tin sopi di galiña, carni, crema di pampuna. Tambe lo tin aroz con pollo y tambe pan dushi. E benta di esakinan lo ta te ora tur cos caba of te cu 4’or di atardi. Tambe lo tin un box pa asina duna bo contribucion. Tambe por trece articulonan manera pampers pa hende grandi size grandi y paña.
Gradicimento ta bai na fundacionnan manera FCCA y otro organizacionnan y diferente famia cu a duna nan aporte na e famia aki, cu a yuda nan cu cas y tambe muebels y demas cos, como cu nan a perde tur cos. Nan ta falta tambe cierto materialnan manera nan bril, machine pa controla presion di sanger y sucu, ensure (como cu nan tin un dieta pa nan sucu). Tur cos lo wordo aprecia. Por duna ayudo via bank account. E number di cuenta ta conoci cerca George Winterdal, kende bo por yama na: cel no. 561 6151.
Riba Diasabra y Diadomingo lo tin diferente candidata di Miss Teen Aruba Internacional cu a participa den e concurso di e aña aki cu lo ta presente cu nan buzon pa asina tambe recauda placa.
Un danki ta bay na tur cu a yuda cu snacks, bolo, pan, etc y ta haci un yamada na cuakier persona cu ta desea di yuda door di duna snacks, bolo of cuminda pa asina bende riba diadomingo awor pa tuma contacto cu George Winterdal. Asina ta haci un yamada na comunidad di Aruba pa duna un man na famia Bedoya cu e bendemento di cuminda y tambe recuadacion di placa y articulonan necesario.
