Den marco di Dia Mundial di Medio Ambiente (5 di juni) y rumbo na Dia Mundial di Oceano (8 di juni), director di Directie Natuur en Milieu (DNM), Gisbert Boekhoudt, a destaca e importancia di integra proteccion di naturalesa den e manera cu Aruba ta biba, desaroya y maneha su isla.
Segun Boekhoudt, Directie Natuur en Milieu ta envolvi den e proseso internacional di “Man and the Biosphere” (MAB), un iniciativa di UNESCO cu ta busca crea un balance entre conservacion di naturalesa, desaroyo economico y actividad humano.
“Nos ta traha pa incorpora naturalesa den e decisionnan cu nos ta tuma como comunidad y den e manera cu hende ta uza y desaroya Aruba,” Boekhoudt a expresa.
E director a splica cu Aruba a desaroya un National Biodiversity Strategic Action Plan (NBSAP), un plan nacional cu a wordo aproba na 2024 y cu ta forma un fundeshi importante pa e vision di Biosphere Reserve.
Segun Boekhoudt, e enfoke di “Man and the Biosphere” ta reconoci cu naturalesa no por ta mira separa for di comunidad. E sistema ta inclui area proteha, area di transicion y tambe zona unda hende biba, traha y ricibi bishitantenan.
“Aruba entero ta forma parti di e vision aki. Naturalesa no ta solamente den area proteha; e ta conecta cu nos bida diario, turismo, economia y comunidad,” el a explica.
Directie Natuur en Milieu, como instancia publico den area ambiental, ta traha riba preparacion di maneho, recomendacion di ley y revision di legislacion relaciona cu proteccion ambiental y designacion di area protehi.
Boekhoudt a enfatisa cu e proceso aki ta realisa den colaboracion cu diferente stakeholder, usuarionan di tereno y experto tecnico. Pa recopila informacion, DNM ta combina ciencia natural, remote sensing y informacion cientifico y historico pa evalua condicion di habitat y presencia di especie vulnerabel.
E director a menciona tambe cu e vision ambiental di Aruba ta conecta directamente cu diferente iniciativa cu ya ta den marcha, incluyendo proyecto di herbebossing, restauracion di habitat natural y fortalecemento di Aruba Marine Park.
Durante e Common Good Conference, Gobierno di Aruba tambe a firma diferente MoU y acuerdo enfoca riba sostenibilidad, restauracion ambiental y cooperacion cientifico internacional. Segun Boekhoudt, e tipo di colaboracion aki ta esencial pa fortalece capacidad tecnico y maneho sostenibel riba largo plaso.
Den referencia na areanan costero y marino, Boekhoudt a indica cu tin diferente actividad humano cu tin impacto riba biodiversidad y condicion di lama. Pa e motibo ey, Aruba ta busca un balance entre conservacion y desaroyo economico.
“Tin espacio pa actividad economico y maritimo, pero e reto ta pa logra esaki den un manera balansa y duradero,” el a conclui.
Segun Directie Natuur en Milieu, e siguiente fase pa Aruba lo ta sigui fortalece cooperacion entre gobierno, comunidad, sector priva y organisacionnan ambiental pa asina construi un modelo di desaroyo cu ta pone naturalesa y sostenibilidad como parti integral di futuro di Aruba.
Gisbert Boekhoudt riba Dia Mundial di Oceano: “Naturalesa mester forma parti di bida diario y futuro di Aruba”
