E debate rond di e Rijkswet Financieel Toezicht Aruba (HOFA) ta sigui lanta polemica, unda partidornan pro ta hunga un papel central den bentaha presupuestario y gobernacion financiero. Sinembargo, analisando e argumentonan principal cu ta wordo campaña den esfera publico, ta bira cla cu e realidad ta desvia totalmente di e discurso oficial. Ta na su luga pa para keto na tres pilar fundamental cu ta sostene e posicion pro-HOFA y confronta esakinan cu e berdad
institucional y financiero di nos pais.
E Falsa Promesa di Control Externo
E prome argumento cu frecuentemente ta resona ta cu presencia di HOFA ta garantia di “mas control” na Aruba, sugeriendo cu sin un supervision externo, gobernacion ta carece di vigilancia. Segun parlamentario Xiomara MAduro e argumento aki ta ignora e realidad constitucional y e infrastructura democratico cu e pais ya ta posee. Na Aruba, e cadena di control ta consisti di instancianan stabliel na cas mes: Parlamento como organo di supervision supremo, Algemene Rekenkamer (Cámara di Cuenta), Centrale Accountantsdienst (CAD), Conseho di Minister, Raad van Advies, y e Ombudsman.
Fortalecemento di gobernacion financiero no ta rekeri imposicion externo, sino inversion interno den e independencia y capacidad operacional di e instancianan aki. Ora cu control local ta faya, e solucion den un democracia maduro no ta cede soberania, sino duna e institucionnan nacional e espacio, presupuesto y autoridad legal pa eherce nan labor sin interferencia.
Inversion y e Realidad di Financiamentu
E di dos argumento cu ta wordo vocifera ta cu HOFA ta un condicion sin cual Aruba no por atrae placa pa inversion. E proposicion aki ta crea un falso dilema entre supervision rigo, externo y desaroyo economico. Inversion publico y proyectonan di capital no ta depende di e existencia di un Rijkswet, sino di un maneho fiscal sostenibel, credibilidad comercial y un capacidad di ehecucion solido.
Financiamento internacional y local ta basa riba e balor credito di Pais Aruba, disciplina presupuestario, y e confiansa di inversionistanan den e stabilidad di nos economia. Un pais por mantene finansas publico sano y atrae capital sin mester baha cabes pa un structura di supervision cu ta limita autonomia gubernamental y e
poder di decision di pueblo su representantenan.
Mito di e Debe Caro riba Mercado Internacional
E di tres punto ta toca e mercado di capital, unda ta papia cu prestamo riba mercado internacional ta sirbi solamente pa enrikece banco stranhero, compara cu e opcionnan pretende barata cu HOFA lo por facilita bou di condicionnan di Reino, eliminando e debe caro di Aruba. Realidad ta mustra cu mercado di capital ta habri porta pa competencia transparente, unda tipo di interes ta wordo dicta pa condicionnan global di mercado y e perfil di riesgo di e pais.
Acepta condicionnan financiero rigido bao di tutela di Reino no ta automaticamente garantia di un salida financiero mas barata si e costo nan di transaccion, e perdida di autonomia di decision, y e impacto social ta wordo calcula den e balansa general. Solucion pa e debe nacional no ta pasa pa entregamento di autoridad presupuestario, sino pa maneho prudente di gastonan coriente y stimulacion di crecemento economico sostenibel di nos propio yiunan di tera.