Fiscal a baha pisa riba e homber Colombiano biba na Aruba E.B.C. (46), kende a hinca su pareha E.M. tres biaha cu cuchiu.
Por a compronde cu Fiscal ta haya E.B.C. culpabel di intento di mata y a exigi 5 aña di prison.
Den sala di Corte tabata presente e ex pareha di E.B.C., E.M., nan tres yiunan, famianan di E.M. y E.B.C.
HINCA DAMA DEN GARGANTA Y BARIGA
Fiscal ta acusa E.B.C. cu riba 11 Februari 2026, el a purba mata y maltrata dama E.M. E.B.C. a hinca E.M. cu cuchiu, dos biaha na garganta y un biaha na bariga. Fiscal tambe ta acusa E.B.C. di intento di causa herida severo.
Hues a bisa cu E.B.C. a admiti di a hinca. Hues a puntra E.B.C. pakico el a haci’e. E.B.C. a bisa Hues cu e momento ey e no tabata conciente kico el a haci. Hues a bisa cu Polis y psychiater puntra E.B.C. kico a causa cu el a bira asina agresivo y a hinca e dama E.M. E.B.C., na yoramento a bisa Hues cu e tabata depresivo. E.B.C. a sigui bisa cu e tabata sinti cu el a perde su famia y cu no tabata vale la pena. Hues a bisa cu por a compronde cu ya nan tabatin 20 aña hunto y hasta a bay terapia pero e victima E.M. a dicidi di divorcia.
Hues a puntra kico a pasa e anochi di 11 Februari 2026. Segun E.B.C., tabata mas o menos 3’or di marduga y E.M. no a yega cas ainda. E.B.C. a bisa cu e tabata manda mensahe riba cellular pero E.M. no tabata contesta. Esey a pon’e pensa cu E.M. lo tabata cu un otro homber. E momento ey e tres yiunan (dos homber y un muher) tabata na cas na soño. E.B.C. a bisa cu ora E.M. a yega cas, e portanan di camber tabata na yabi. E no tabata kier pa E.M. bay den camber serca dje y nan yiu muher. Ora E.M. a bati na e porta di camber, E.B.C. a habri porta y puntra di unda E.M. ta bin. E.M. no a bisa nada y e ora ey E.B.C. a perde cabez.
YIU TA PUSHA SU TATA CU A HINCA SU MAMA
El a bisa cu e no ta corda kico a pasa y a bin bek na tino ora cu su yiu homber a cuminsa grit’e. E yiu homber a scucha gritamento y a core bay den e camber y a mira su tata E.B.C. cu cuchiu den man y su mama na sanger. E yiu a pusha E.B.C., kende e ora ey a bisa su yiu pa yama ambulance pasobra el a spanta. E dama E.M. a sufri 2 hinca den nek y un hinca na banda di bariga. E.B.C. na yoramento a bisa Hues cu ta duel’e hopi loke a sosode.
Hues a bisa cu Polis a haya yamada pa un caso di pelea cu hincamento. Na e cas Polis a mira e dama E.M. na sanger y un sarbete na sanger. E.B.C. a bay pafor y e yiu homber tur histerico a bisa Polis cu su tata a hinca su mama 3 biaha cu cuchiu. Polis a mira den cas sanger riba vloer y a haya e cuchiu. Den cas tabata un otro yiu homber y un yiu muher. E yiu homber mas grandi a bisa cu tabatin problema entre su tata y mama y cu nan tabata planea pa separa. Mas o menos 3.10 di marduga el a spierta door di gritamento. Ora el a bay den camber, el a mira su mama drumi riba cama na sanger y su tata para dilanti su mama. E mama a bisa su yiu cu E.B.C. a hink’e 3 biaha. E ora ey e yiu a pusha e tata.
E mama E.M. a bisa Polis cu el a bay un fiesta di un amiga y ora el a yega cas, el a bay den camber y ora e tabata kier kita su carson, E.B.C. a hink’e cu cuchiu. Hues a mustra potret di e cuchiu y bisa cu ta un cuchiu basta grandi y skerpi. Hues a puntra, con bin cu e cuchiu tabata den camber. Segun E.B.C., el a bay come apelsina den camber y a usa e cuchiu. El a laga e cuchiu riba mesa banda di cama. Esaki tabata mas o menos 1or. Hues bisa cu segun imagennan di video di seguridad, 2.45 ta mira E.B.C. ta cana bay den camber cu cuchiu. Segun E.B.C., el a bay come apelsina.
Hues a bisa cu segun raport medico, tin un hinca na banda di nek y un hinca dilanti na e nek. Tambe un hinca na bariga. Ta asina cu mester a haci operacion di biaha na bariga pa evita cu lo causa daño.
Ariba pregunta di Fiscal, E.B.C. a admiti cu un biaha el a bay spiona E.M. si ora e caba di traha, e ta bay cu un otro homber. Fiscal tabata haci E.B.C. varios pregunta encuanto e cuchiu. Segun E.B.C., e no ta corda cu el a hinca E.M. na nek y bariga. Hues a mustra cu ya caba E.B.C. tin 206 dia sera den KIA.
VICTIMA NO KIER PA CASTIGA ACUSADO
E dama E.M., na yoramento a bisa Hues cu e ta pordona E.B.C. E momento ey por a mira E.B.C. cabez abao ta yora. E.M. a bisa cu nan tin tres yiu pero na dado momento cosnan no tabata bon y el a dicidi di divorcia. El a pidi Hues pa no castiga E.B.C. pisa. El a bisa Hues cu el a retira tur denuncia contra E.B.C. pa asina E.B.C. por ta mas pronto cu su yiunan. E.M. a bisa cu e kier tin paz mental y cu su yiunan. Por a nota cu e yiunan y famianan tabata yora. Hues a dicidi di pospone e caso pa 10 minuut pasobra tabata hopi emocionante den sala.
PSYCHIATER TA HAYA ACUSADO TA RESPONSABEL
Despues di e pause a sigui cu e caso caminda Hues a mustra cu segun psychiater, E.B.C. no por a controla su mes pero e ta responsabel pa su actonan. Psychiater ta haya cu lo ta bon cu E.B.C. y famia cay bou guia di Reclasering pa asina cana e proceso di divorcio. Ta asina cu E.B.C. ariba pregunta di Hues a bisa cu tur cos ta mustra cu mester divorcia. Abogado mr. Arends Marchena a bisa Hues cu ya nan ta divorcia pero a dicidi di warda con ta para cu e caso pa asina regla e cuestion di e yiunan.
FISCAL TA BAHA PISA
Fiscal a bisa Hues cu aki ta trata di un lamentable caso caminda violencia entre pareha a bay for di man. Nan tin casi 20 aña hunto. Pa tempo largo tin problema den relacion. E.B.C. tabata sospecha cu E.M. lo tin otro pareha. Fiscal a bisa cu riba dia di incidente, E.M. a bay un fiesta y den careda di 3’or di marduga a yega cas. E.B.C. a puntra E.M. unda e tabata. Na dado momento E.B.C., den su rabia, a pasa man pa un cuchiu y a hinca E.M. tres biaha. E.M. a wordo hinca 2 biaha na nek y 1 biaha na bariga. Fiscal a bisa cu door di e hinca na bariga, e dama E.M. a keda interna den hospital. Fiscal a bisa cu nek y bariga ta partinan vital di un curpa cu por causa morto. Na opinion di Fiscal, e hecho cu mester a haci operacion urgente na bariga di E.M., ta mustra cu e caso ta serio. Segun Fiscal, e forma di a hinca 2 biaha na garganta y 1 biaha na bariga, E.B.C. a tuma e riesgo di intento di mata. Fiscal a mustra cu rabia no ta motibo di considera cu E.B.C. no tabata conciente. El a mustra cu Pshychiater ta mustra cu E.B.C. ta responsabel pa su actonan. Fiscal ta haya legalmente proba cu E.B.C. ta culpabel di intento di mata. El a bisa cu e hincamento a sosode den cas unda e yiunan tabata tey. Esaki a afecta e famia completo.
EXIGI 5 AÑA DI PRISON
Pa cu e castigo, Fiscal a bisa cu e ta tene cuenta cu ta promer biaha cu E.B.C. ta cay den man di husticia. El a mustra cu Psychiater ta haya cu E.B.C. ta responsabel pa su actonan. Fiscal a bisa cu e ta tene cuenta cu castigonan di Hof pa casonan asina. Fiscal no ta haya cu aki por exigi castigo combina. Fiscal tin comprension pa expresion di e victima den Corte. Sinembargo Fiscal ta haya cu mester manda señal bon cla den comunidad cu no ta accepta incidente asina. Fiscal a exigi 5 aña di prison pa E.B.C. Por a mira cu E.B.C. a bolbe baha cabez y cuminsa yora.
DEFENSA ABOGADO
Abogado mr. Arends Marchena a bisa Hues cu despues di 20 aña di relacion, e dama E.M. a bisa cu door di problema den pareha, el a dicidi di divorcia. E famia ta consisti di 3 yiu. E decision di E.M. a afecta E.B.C., kende no tabata sa mas kico pa haci. E tabata sospecha cu E.M. tabatin un otro pareha. Ariba e anochi 11 Februari 2026, ora E.M. a yega cas 3’or di marduga, E.B.C. a perde cabez y a hinca E.M. Ta ora cu e yiu homber a drenta camber y pusha E.B.C., el a realiza kico el a haci y a bisa e yiu pa yama ambulance y Polis. E abogado a mustra Hues cu den un sentencia recien na Hulanda den un caso similar, e victima a pidi Hues pa no duna castigo pisa. Corte a condena e culpabel na 24 luna di prison. E abogado a mustra cu den e caso aki, e victima E.M. ex pareha di E.B.C. a pidi Hues pa baha e castigo pa asina E.B.C. ta hunto cu su yiunan. E abogado a pidi Hues pa tene cuenta cu esaki.
Hues a sera tratamento di e caso y a bisa cu 18 September lo tin sentencia.