Gobierno ta reacciona: Gobierno no a corta den pensioen di pensionado pero riba Gelijk Bedrag

Gobierno di Aruba a tuma nota di expresionnan di e organisacion cu ta representa pensionadonan, OPPA, relaciona cu e recorte den e pensioen di pensionadonan. Esaki despues cu sindicatonan y OPPA a sali di reunion cu Secretario di Estado van Huffelen, y segun nan, sra. Van Huffelen lo a bisa cu Hulanda no a pidi pa corta den pensioen di pensionadonan.

Ta importante pa recorda tur hende cu nos areglo di pensioen na Aruba ta uno complica y no ta hopi hende ta compronde. OPPA si ta compronde y OPPA sa cu Gobierno no a corta den pensioen di pensionado, ni den duurtetoeslag di pensionado.

Ora Covid a benta Aruba su finansas abou, y no tabata tin placa pa paga tur e gastonan di Gobierno, entre otro e gelijk bedrag, Gobierno a hay’e obliga di corta 50% di gelijk bedrag. Esaki ta un toelage di 3.170 florin cu Gobierno ta paga na pensionadonan di Gobierno extra den luna di december. E suma aki ta wordo financia for di caha di Gobierno. Y e ta wordo paga solamente na pensionadonan di Gobierno cu a baha cu pensioen prome cu 2015. E pensionadonan di Gobierno cu a baha cu pensioen despues di 2015 no ta ricibi esaki.

Ta esnan cu ta ricibi e gelijkbedrag mester a entrega 50% di dje.

Pues no ta asina cu Gobierno di Aruba a haci algo cu no tabata por. Gobierno di Aruba na 2020 a haci tur loke tabata tin mester pa por rescata nos pais.

Gobierno a anuncia diabierna cu lo bay cuminsa paga empleadonan publico e 5% di nan salario basico y ta calculando cuanto di e gelijkbedrag por paga bek na december e aña aki caba. E trabounan ta andabdo pa por logra esey pa por haci e pago na tempo.