Aruba a caba di sali for di un crisis di pandemia y awor a drenta den un crisis di moralidad. E crisis di moralidad ta evidente ora cu un minoria kier impone nan estilo di bida riba mayoria di nos pueblo cu menasa y opresion. E lobby homosexual ta e partidonan politico hunto cu otro activistanan den sociedad cu ta pusha e agenda homosexual sin tene cuenta cu etica. E lobby homosexual a purba drenta school silenciosamente pa indoctrina nos muchanan. Danki na mamanan balente esaki a keda desenmascara y minister a tuma medida. Si cualkier persona duna su opinion publicamente contra matrimonio di mesun sexo e lobby homosexual ta cla pa intimida nan na trabou of purba di kita cualkier sosten financiero cu nan por haya. Hasta nan a bin cu e menasa pa impone belasting riba Iglesia. Pueblo di Aruba mes tabata testigo con e lobby homosexual a kita e presidente di Parlamento for di su puesto pasobra e no a vota na fabor di nan ideologia. E crisis di moralidad a conoce su punto culminante ora cu huesnan hulandes a pone deseo di pueblo di Aruba un banda y a impone matrimonio di mesun sexo riba nos. Kico e lobby homosexual lo haci cu empleadonan di gobierno cu pa motibo di consenshi no por efectua un matrimonio entre personanan di mesun sexo?
Caida di Gobierno
Mesora cu Parlamento a rechasa matrimonio di mesun sexo e lobby homosexual den Parlamento a canta guera contra esnan cu a vota contra. Nos ta corda con a menasa un Parlametario cu e lo no bira minister den un proximo coalicion. Griffier di Parlamento tambe a bira victima di represaya di e lobby homosexual. Nos a mira con un partner di coalicion a cera cabes cu oposicion pa pasa e puesto di presidente di Parlamento pa un persona cu si a vota na fabor di matrimonio di mesun sexo. E lobby homosexual no ta respeta libertad di pensamento, consenshi y religion di nos pueblo. Gobierno a cay pa motibo di matrimonio di mesun sexo, cu otro palabra ta e crisis di moralidad a pone cu na december proximo tin eleccion.
Eleccion 2024
Pueblo di Aruba mester proteha su mes contra e lobby homosexual cu kier kibra nos cultura, nos norma y balornan. E unico manera pa proteha nos pueblo contra esaki ta pa cambia nos areglo di estado cu diescuatro voto den Parlamento. E lobby homosexual kier a spanta pueblo door di bisa cu nos constitucion no por bay contra e veredicto di Corte Superior den e asunto matrimonio di mesun sexo, sino nos tin cu bira independiente y sali for di reino hulandes. Si Aruba tabata un pueblo cu ta sucumbi pa menasa anto awe nos lo tin nos status aparte. E lobby homosexual a reta pueblo di Aruba pa wak si di berdad Aruba ta para pa moralidad. Mayoria di e pueblo di Aruba kier mira matrimonio defini den nos areglo di estado como un acto legal entre un homber y un muhe. Iglesianan Cristian di Aruba lo haci tur intento pa den e siguiente Parlamento yega na diescuatro homber y muhe balente cu lo lucha pa cera e buraco den ley cu e lobby homosexual a maluza pa pusha matrimonio di mesun sexo riba nos pueblo. Matrimonio di mesun sexo ta djis e comienso, pasobra nan a bisa caba cu eutanasia y abortus ta riba nan agenda. No ta laat, ainda Aruba por salvaguardia matrimonio den nos leynan. Eleccion 2024 ta un referendum pa pueblo expresa su mes tocante di matrimonio y moralidad.