Featured Bonaire Politica Internacional

Kolegio Ehekutivo di Boneiru ta pidi gobièrnu di Kòrsou pa yuda ku ‘kuestion di SVB


Pa medio di un karta Kolegio Ehekutivo a pidi atenshon di gobièrnu di Kòrsou pa e splikashon ku SVB – Banko di Seguro Sosial na Willemstad ta duna na e veredikto di Korte Komun relashoná ku kòrtamentu den penshun di behes – AOV di hendenan ku no ta residente di Kòrsou, entre nan algun shen habitante di Boneiru.

Kolegio Ehekutivo ya kaba a hasi esaki mesora na aña 2017 ora Kòrsou pa medio di un ordenansa nashonal entrante 1 di yanüari di e aña ei a disidí pa redusí penshun di behes – AOV di tur hende ku tin derecho riba esaki i ku no ta biba na Kòrsou ku 10% i alabes kita nan gratifikashon di Pasku. E tempu ei a plantia e kestion serka sekretario di estado Klijnsma di Asuntunan Sosial i Empleo tambe. E esfuersonan ei no a kondusí na adaptashon di e ordenansa.

Entretantu tin un veredikto di Korte Komun. Den un kaso di apelashon ku un habitante di Boneiru a entamá, Korte Komun a husga ku e desishon pa redusí penshun di personanan ku tin derecho riba penshun di behes – AOV, i ku no ta biba na Kòrsou, ku 10% i alabes kita nan gratifikashon di Pasku no ta legítimo si e personanan akí ta kumpli ku kuater kondishon.

Banko di Seguro Sosial – SVB ta sali for di e punto di bista ku e veredikto ta konta solamente pa e siudadano ku a entamá e kaso den korte i no pa otro personanan ku tin derecho riba penshun di behes – AOV ku aktualmente ta biba na Hulanda Karibense. Kolegio Ehekutivo ta di opinion ku e splikashon aki ta en pugna ku e veredikto di Korte Komun i a disidí pa un biaha mas aserká gobièrnu di Kòrsou ku e súplika pa koperá ku solushon di e asuntu akí konforme e veredikto di Korte Komun.

‘Ta trata di hendenan ku semper a kumpli kabalmente ku pagamentu di nan prima, ku di ripiente a haña nan mes konfrontá ku un desishon unilateral pa redusí nan penshun di behes – AOV. E veredikto di Korte Komun ta bon kla: nan tin ku haña loke nan tin derecho riba dje. Pa evitá ku nan kada un individualmente mester entamá un kaso den korte ku tur e gastunan enbolbí, nos a disidí pa hasi un apelashon riba gobièrnu di Kòrsou pa konhuntamente haña un solushon’, segun diputado Den Heyer

Related posts

Parlamentario Rocco Tjon a bishita DIP

EA News Author

KON MI TA PROPONÉ UN HENDE KOMO SUIDADANO DI HONOR PA DIA DI BONEIRU

EA News Author

FADA ta presenta un otro storia di famia, dos yiu cu ta recorda nan mama y nan cambio di bida diripiente

EA News Author

1 comment

Leave a Comment