Frakshon di MAN despues di a tuma nota di kandelanan ku a kousa morto di diferente siudadanonan ku sierto deshabilitashon, a pone ku nan no por a salba nan mes, Frakshon di MAN ta pidi pa duna mas atenshon spesífiko na protekshon dje personanan aki den nos komunidat.
E protekshon mester kondusí na halsa e protekshon dje habitante ku sierto desabilidat, ku hopi bia ta kada menasa i pèrdè nan bida, debí ku nan ta nan so na kas. Sierto hende ku deshabilitashon hopi biaha no por hiba su mes den seguridat ora esaki ta nesesario, paso nan deshabilitashon simplemente no ta por hasi esaki posibel. Un hende na kama, un hende ku deshabilitashon mental na sierto grado, sierto hendenan den ròlstul, nos hendenan grandi so den kas èts èts.
E siudadanonan aki no tin un nivel di auto-sobrebibensia ku un hende sin e limitashonnan aki.Den kaso di kandela p.e. e personanan aki su auto-sobrebibensia ta 100% dependiente di un tersera.
Pa por alsa e protekshon dje siudadanonan aki, mester hasi mas pa personanan relevante hasi lo nesesario pa aktua, si dado kaso un insidente tuma lugá, i e persona, mester ser yuda, salba, evakuá òf un sistema di protekshon mas sigur, sali for di maneho di e ministerio. Kisas un forma di pone hendenan di konfiansa den serkania dje kas na altura, pa ora algu sosodé, por aktua mesora.
Pa e motibu nan aki frakshon di MAN kier komprondé e maneho ku minister tin pa ku e situashon fèrfelu aki.
Den kuadro aki Frakshon di MAN ta hasi e siguiente preguntanan na minister sra. Larmonie-Cecilia, di Desaroyo Sosial, Labor i Bienestar(SOAW).
1. Minister a tuma nota di e suseso nan lamentabel di último tempu relashoná ku hendenan ku tin un desabilidat?
2. Minister tin un maneho di sosten na famia, na momento di sitashonnan asina aki?
3. Si tin e maneho aki, esaki a wòrdu aktivá den e último kasonan resien di kandela?
4. Kua ta e protokòl ku ta keda apliká den e kasonan aki?
5. Por kompartí e protokòl aki ku Parlamento?
6. Den kuadro di prevenshon, kiko te pasonan konkreto ku e ministerio ta bai tuma, asina nos por protehá nos hendenan mas tantu ku ta posibel,un maneho huntu ku otro ministernan di vital importansia ku tin relashon ku e grupo spesífiko aki?