Siman pasa Minister President durante un reunion, a cera conoci cu sr. Edson Hato, cu desde September 2023 a tuma e encargo over di sr. Erwin Arkenbout como representante di Hulanda na Aruba, Corsou y Sint Maarten.
Prome Minister a expresa cu na e momentonan aki ta hopi importante riba tur nivel pa tene tur canalnan habri cu Hulanda. Principalmente awor aki cu Aruba ta haciendo tur esfuerso posibel pa por yega na baha e interes di e refinanciamiento di e debe di covid. Esaki a wordo delibera riba dje durante e reunion cu sr. Hato y tambe a atende otro temanan entre otro e formacion di gobierno di Hulanda y kico por wordo spera pa e islanan.
Sr. Hato hunto cu sr.Vincent Storimans, kende ta hefe di oficina di Representacion di Hulanda na Aruba, a asisti na e acto protocolar di Dia di Betico y por a goza di e bunita homenahe na e gran Libertador Betico Croes.
