Diahuebs mainta, durante conferencia di prensa di Gobierno di Aruba, Minister di Husticia y Asuntonan Social Sr. Rocco Tjon a elabora mas tocante e cooperacion estrecho entre e diferente departamentonan, cu ta traha hunto pa loke ta trata siguridad na nos fronteranan. Algun dia atras a tuma nota di un intercepcion exitoso di un lancha cu 11 persona a bordo cu a haci intento pa drenta nos pais. E Mandatario a haci uso di e oportunidad aki pa por splica un poco mas tocante e parti di e “plan van aanpak grenz toezicht”, cual a wordo scribi conhuntamente cu y aproba pa Hulanda den cuadro di e “landenpakket”. Na November di aña pasa, Hulanda a aloca cuater miyon Euro pa e ehecucion di e plan aki.
Parti di e plan aki ta den ehecucion caba, mirando cu e cooperacion entre e diferente departamentonan a wordo intensifica. Adicionalmente, e radarkamer ta wordo ocupa 24/7, danki na e bon colaboracion entre e departmentonan cu ta pone nan personal disponibel pa cu esaki. E deparamentonan encarga cu e parti aki ta Guarda nos Costa, Kustwacht y Cuerpo Policial. Otro aspecto cu tambe ta den pleno ehecucion ta e parti di e “surveillance team” cu actualmente ta patruyando nos costanan.
Den cuadro di e “plan van aanpak”, actualmente lo bay enfoca mas den e parti investigativo, caminda lo haci uso di fondonan disponibel, pa asina lanta un departamento multidisciplinario pa loke ta inteligencia y informacion. E departamento aki lo percura pa investiga henter e netwerk, pa saca afo si e persona cu ta purba di drenta nos pais ta hayando cooperacion di un persona dentro di nos pais, pa asina por trata e situacion aki.
E departamento di “Menshandel en Mensensmokkel” di nos Cuerpo Policial lo bay wordo amplia pa e parti di conduci investigacion. Adicionalmente, e conexion entre e departamento menciona cu e departamento di Maritiem Politie ta di suma importancia, pa asina percura pa tin un miho proceso investigativo. Di e manera aki, ta haci cu e intento pa drenta nos pais ta un menos atractivo, pero tambe menos atractivo pa esnan cu ta yuda e personanan aki drenta nos isla na un forma ilegal.
Na banda di esaki, lo bay enfoca hopi mas riba e parti di e “bestuurlijke aanpak”, unda no solamente lo bay duna atencion na e parti “strafrechterlijk”, pero lo duna atencion tambe na e parti “bestuurlijk”. Esaki lo tin consecuencia, den forma di un multa mucho mas halto, pa esnan cu ta emplea personanan indocumenta, asina diferente compania a ricibi multanan caba, cu a yega te cu 75.000 Florin. Cada departamento concerni, a wordo notifica di e multa aki y lo reuni e luna aki pa intensiva e multanan mas aun.
Segun e Mandatario, actualmente ora ta trata di e prome infraccion, ta duna un advertencia prome, pero awo esaki ta bay cambia. Na e prome infraccion lo bay duna un boet cual lo ta uno mas halto cu loke e ta actualmente. Adicionalmente, lo bay actua mas fuerte y duna multanan mas halto na tur persona cu ta facilita e personanan indocumenta, den forma di estadia ilegal of cu ta brinda cualkier otro tipo di ayudo. Na momento cu e personanan aki wordo gara, lo pasa tur e gastonan cu tin di haber cu e situacion, pa e persona local cu a yuda e persona indocumenta, y lo responsabilisanan pa e acto aki.
Por ultimo, Minister Tjon a splica cu actualmente ta trahando riba e parti legislativo, unda cu hunto cu huristinan, ta analisando e ley pa wak con por haci un estadia ilegal na Aruba, uno castigabel pa ley. Pa medio di e medidanan adicional aki, nos como pais Aruba lo por brinda un miho defensa contra e fenomeno aki, di personanan cu kier drenta nos pais na un forma ilegal.