Maltrato
Djaluna 3 di mart, alrededor di 12.35 or di mardugá, ‘meldkamer’ sentral a risibí notifikashon tokante un dama heridá den kurá di un kas ma Kaya Okavango. Na e sitio polis a topa ku e víktima ku vários herida. Ambulans a transportá e víktima pa hòspital pa tratamentu médiko. Ta investigando e kaso.
Notifikashon di hinkamentu i tiramentu
Djadumingu 2 di mart, algun minüt promé ku 9 or di anochi, polis a risibí notifikashon di kuater (4) persona ku heridá di bala ku a yega hòspital. E 4 personanan heridá tabata enbolbí algun ratu promé den un bringamentu ku a tuma lugá den bisendario di ‘Centrumgebied’. Despues di investigashon mas aleu a resultá ku e personanan tabatin herida prosedente di hinkamentu i no di bala.
Algun ratu despues polis a risibí un otro notifikashon di un ‘drive-by-shooting’ riba un vehíkulo ku tabata stashoná na Kaya L.D. Gerharts. A konfiská e vehíkulo pa mas investigashon. Ambos kaso ta bou di investigashon.
Violensia públiko
Djadumingu 2 di mart, alrededor di 8.20 or di anochi, ‘meldkamer’ sentral a risibí notifikashon ku un grupo di hóben a kita yabi di e persona ku a mèldu. Kòrtiku despues, e mesun persona ku a mèldu a yama atrobe i a mèldu ku e hóbennan a kibra winshil di su outo. Na momentu ku polis a yega na e sitio, e persona ku a mèldu a deklará ku e tabata sintá den su outo i e grupo di hóben a habri su porta di outo i a dal’e vários biaha. Despues di esaki e grupo di hóben a bai for di e sitio pero a bini bèk algun ratu despues i a kuminsá skòp su outo i a kibra su winshil. Ta investigando e kaso.
Detenshonnan pa manehá bou di influensia
Djadumingu 2 di mart, alrededor di 5.25 or di atardi, ‘meldkamer’ sentral a risibí notifikashon tokante un aksidente entre un outo i un bùs riba Kaya Pos di Amor. Despues di e aksidente, e bùs a sigui kore bai. E shofùr di e outo a disidí di sigui kore tras di e bùs i a logra para esaki riba Kaya Monseigneur Nieuwindt. Konforme e maneho di ‘botsen is blazen’, a hasi un tèst di supla ku ámbos shofùr i a resultá ku e shofùr di e bùs, kende a kousa e aksidente i a sigui kore, a konsumí mas alkohòl ku ta permití na momentu ku bo ta manehá un vehíkulo. A detené e hòmber di inisial J.R.C.L. di 49 aña di edat i a hib’é warda di polis pa un análisis di rosea. A konsekuensia di e resultado di esaki a konfiská su reibeweis.
Den oranan di mardugá di djadumingu 2 di mart, alrededor di 1.40 or, a detené un hòmber di inisial O.S.I. di 33 aña di edat na Kaya Filomena pa manehá bou di influensia di alkohòl. E detenshon a tuma lugá despues ku a drenta notifikashon ku shofùr di un un pikòp a pasa riba un baiskel riba e kaya menshoná. Despues di e aksidente, e shofùr di e pikòp a bandoná e sitio di aksidente i a laga e vehíkulo keda. Na e sitio, polis a topa ku e pikòp, e siklista i e persona ku a mèldu. E doño di e baiskel a deklará ku despues di e aksidente e shofùr a baha i a kore bai den un otro outo. Nan tabata sospechá ku e shofùr ta bou di influensia di alkohòl. Abase di e deklarashonnan di e persona ku a mèldu i e siklista, e patruya a kuminsá mesora ku un búskeda. E shofùr tabata konosí pa polis. A buska den bisendario ku resultado negativo. Ora ku e agentenan a yega bèk na e sitio di e aksidente, nan a topa ku e shofùr di e pikòp kende a regresá na e sitio. A hasi un tèst di supla ku e shofùr i a resultá ku el a konsumí mas alkohòl ku ta permití. Seguidamente a hib’é warda di polis pa un análisis di rosea. A konsekuensia di e resultado di esaki a konfiská su reibeweis.
Djasabra 1 mart, alrededor di 8.35 or di anochi, a detené un hòmber di inisial E.R.V.C. di 62 aña di edat na Kaya Macario (Cai) Sint Jago pa manehá bou di influensia di alkohòl. E sospechoso tabata enbolbí den un aksidente riba e kaya menshoná. Durante kombersashon por a konstatá ku e shofùr tabata mustra diferente karakterístika di un persona ku ta bou di influensia di alkohòl. Konforme e maneho di ‘botsen is blazen’, a hasi un tèst di supla ku ámbos shofùr i a resultá ku e sospechoso a konsumí mas alkohòl ku ta permití na momentu ku bo ta manehá un vehíkulo. A detené mesora i a hib’é warda di polis pa un análisis di rosea. A konsekuensia di e resultado di esaki a konfiská su reibeweis.
Djasabra 1 mart, alrededor di 7.30 or di anochi, a detené un hòmber di inisial W.N.F.M. di 58 aña di edat na Kaminda Tras di Montaña pa manehá bou di influensia di alkohòl. E shofùr a dal ku su outo den un buriku. Durante kombersashon por a konstatá ku e shofùr tabata mustra diferente karakterístika di un persona ku ta bou di influensia di alkohòl. A hasi un tèst di supla kuné i a resultá ku e sospechoso a konsumí mas alkohòl ku ta permití na momentu ku bo ta manehá un vehíkulo. A detené mesora i a hib’é warda di polis pa un análisis di rosea. A konsekuensia di e resultado di esaki a konfiská su reibeweis. Un veterinario a bai ku e buriku.
Detenshon pa menasa i violashon di Lei di Arma di Kandela
Djadumingu 2 di mart, alrededor di 3.25 or di atardi, a detené un hòmber di inisial A.L.C. di 21 aña di edat na Kaya Nikiboko Sùit pa menasa i violashon di Lei di Opio BES. E detenshon a tuma lugá den kuadro di un investigashon andando, despues ku a mèldu ku e hòmber a menasá un persona ku arma di kandela. Investigashon den e kaso ta kontinuá.
A topa ku kurpa sin bida den kas
Djasabra 1 di mart, alrededor di 4 or di atardi, ‘meldkamer’ sentral a risibí notifikashon ku a topa ku un persona ku no tabata duna señal di bida den un kas na Kaya Pauwnee den e bario di Hato. Personal di ambulans ku a akudí na e sitio no por a hasi nada mas pa e persona. Dòkter a konstatá morto di un hòmber di inisial P.M.B. di 83 aña di edat, nasé riba 31 di mei 1941 na Boneiru.
Aksidente entre outo i skuter
Djabièrnè 28 di febrüari, alrededor di 6.35 or di mainta, un aksidente entre un pikòp i un skuter a tuma lugá riba Bulevar Gobernador N. Debrot. Na yegada di polis a topa ku e shofùr di e skuter abou i personal di ambulans tabata dunando e tratamentu. E pikòp a bai hasi ‘U-turn’ riba kaya i no a duna preferensia, dor di kua e skuter a dal den dje. Ambulans a hiba e shofùr di e skuter hòspital pa tratamentu médiko. Konforme e maneho di ‘botsen is blazen’, a hasi un tèst di supla ku e shofùr di e pikòp ku resultado negativo.
Ladronisia na bich
Djárason 26 di febrüari a drenta keho di ladronisia na Playa Pal’i Mangel (Donkey’s Beach), situá na E.E.G. Bulevar. Entre 2.15 or di atardi i 2.30 or di atardi, deskonosínan a bai ku dos tas di lomba ku