Actualmente, nos sector di salubridad ta den centro di un debate profundo. Retonan grandi manera escasez di personal medico, listanan di espera largisimo, integracion di hospitalnan y e costonan halto di cuido, ta rekeri un solucion structural y no simplemente medidanan temporal. Recientemente, Minister di Salubridad a anuncia cu a pone remedi bek riba e lista di AZV. Maske esaki ta un alivio, e decision aki ta laga e pueblo sin un contesta definitivo riba e rumbo di nos cuido. P’esey, Parlamentario Hendrik Tevreden ta lansa un pregunta fundamental: Kico exactamente ta e Plan Nacional pa Cuido di Salud na Aruba?
Tevreden a señala cu si nos no tin un destino cla, ta bira imposibel pa determina cual ta e caminda cu nos mester sigui. El a splica cu durante e ultimo añanan, Aruba a scucha diferente propuesta; un biaha ta papia di fusion, otro biaha di integracion, pa despues cambia e focus pa sostenibilidad financiero, escasez di personal of falta di remedi, sin cu tin un linea defini.
Pa e parlamentario, e retonan actual no por wordo trata como decisionnan fragmenta, ya cu nan tur ta conduci na e pregunta principal: Cual ta e vision strategico pa e futuro di nos cuido, y con Aruba kier pa su sistema di salud ta mustra den 2030, 2035 y 2040?
Den e cuadro aki, el a dirigi e siguiente preguntanan na Minister di Salubridad, cu ainda no a wordo contesta:
Tin un documento nacional cu ta defini esey?
Tin metanan concreto cu por wordo midi?
Tin prioridadnan cla fiha of un roadmap realistico?
Con nos ta bay atrae y retene medico, specialistanan y enfermeronan?
Kico ta e plan pa nos ancianonan y e vision pa salud mental?
Cual ta e strategia pa combati obesidad y enfermedadnan cronico?
Kico ta e rol cu Gobierno ta mira pa ImSan den e futuro cercano?
Con nos ta bay reduci e dependencia riba tratamento na exterior?
Kico ta e rol di tecnologia, inteligencia artificial y telemedicina?
Sin e vision integral aki, nos ta core e riesgo di tuma medidanan individual cu por tin sentido awe, pero cu no necesariamente ta conecta cu un plan structural di maneho pa mañan, Tevreden a enfatisa.
Aruba ta gasta cien di miyones di florin cada aña riba cuido di salud. Esey ta un inversion enorme den bienestar di nos pueblo. Pero inversion sin direccion no ta suficiente. Nos mester un vision nacional cu ta traspasa periodonan electoral, cu ta traspasa gobiernonan di turno y cu ta bay mas leu cu institucionnan individual.
Segun e parlamentario, e reto mas grandi di nos sistema di salud talbes no ta falta di recurso, sino e falta di un direccion comparti. “E pueblo di Aruba merece sa no solamente con nos ta maneha e crisisnan di awe; nan merece sa tambe con nos ta prepara pa e necesidadnan di mañan.”
Y te cu awe, Tevreden ta sostene cu e pregunta mas crucial dirigi na e mandatario ta keda sin un contesta cla y definitivo: Kico exactamente ta e Plan Nacional pa Cuido di Salud na Aruba?