Nos ta bibando den un tempo, cu ta masha hopi cos ta bay sali na cla, cosnan cu nos tin cu prepara nos curason pe, pasobra si un hende no perservera, y mantene su wowo riba Cristo Hesus lo e wordo decepciona.
Tene masha cuidao cu kere den hende,
Cuidao cu idolatria,
Cuidao cu trosemento di palabra,
Masha cuidao cu dobbel animo,
Tene cuenta cu hende cu ta papia so y no ta hacido.
Tene cuenta cu falso profeta, cual hopi hende ta kere cu ta awor nan ta bay sali, pero Cristo Hesus a menciona esey mas cu dos mil anja pasa.
Tin cosnan cu mester sosode pa habri wowo di hende, y pa hende bira fuerte den Senjor y rechasa mentira di diabel, pasobra e tempo ta yegando cu tur mascarada lo cay, tur locual ta dobla lo sali na lus.
Pero laga nos corda riba lo siguiente:
Pablo a bisa den Filipensenan 3:12-14: No cumi a alcansa esaki caba,of cu mi a bira perfecto caba,ma mi ta haci tur mi esfuerso,pa mi por gara e loke pa cual ami tambe a wordo gara door di Cristo Hesus,
Rumannan mi no ta pretende cu mi mes a gare caba, ma un cos mi ta haci: Lubidando loke ta keda atras, y aspirando na loke ta dilanti,mi ta haci tur mi esfuerso pa alcansa e meta, pa hanja e premio di e yamada celestial di Dios den Cristo Hesus.
Ningun hende no por haci nada na nan pasado, pesey e palabra di Dios ta bisa den 2 Corintionan 5:17:
Pesey si un hende ta den Cristo ta un criatura nobo e ta, e cosnan bieu a pasa caba, ata tur cos a bira nobo.
Un hende no por tin bida nobo y sigi cana cu panja bieu bisti, bo no por pone binja nobo den saco bieu.
Una bes bo ta den Cristo, laga cosnan bieu bay, tur locual ta tradicion,cultura, idolatria, cosnan cu Dios ta rechasa, pone nan un banda y pone bo bista riba Cristo Hesus, nos unico Senjor y Salbador.
Si un hende ta bon na altura cu den su cultura cu e a lanta cune, por ehempel cosnan cu su antepasadonan tabata haci, cu no ta boluntad di Dios, awor cu su wowo a habri, y e conoce Cristo Hesus como Senjor y Salbador, ta tempo pa pone cultura y custumber di fabula y fantasia un banda y recorda cu carni y sanger no ta drenta cielo.Tur hende mester muri pa nan yega dilanti di Dios, y wordo husga.
Bendiciona ta un hende cu ta perservera den prueba , pasobra una bes cu e a pasa e prueba, e lo lo ricibi e corona di bida , cu Senjor a priminti na esnan cu ta stim’E.( Santiago 1:12).
Laga perserverancia tin su resultado, perfecto, pa boso por ta perfecto y completo sin falta di nada.
( Santiago 1:4).
Den cada meta den bida di hende, e hende mester perservera, pe balora locual e ta bay ricibi, no worry cu esun cu no ta kere, esun cu ta balota, y esun cu ta haci cherche, wak pa abo ta firme den bo fe , y Dios lo bendiciona bo ricamente, pasobra bo a kere cu Dios ta capas pa haci tur locual cu E a bisa.
Laga nos perservera y sigi haci bon na tur hende, laga nos ta disponibel, tur ora pa bon obra, pa saca man yuda, pa predica e palabra di Dios completo manera e mester ta , sin cambia nada, pasobra Cristo Hesus ta nos fundeshi, e baranca riba cual nos bida ta hancra.
Pastor Marcel Balootje,