Na prome lugar laga nos splica tocante Temor di Dios, Temor di Dios no ta nifica miedo di Dios, e ta nifica respet, reverencia, amor,y dedicacion na Dios y pa cosnan di Dios y tambe e manera di biba cu nos prohimo.
Tene bon cuenta cu lo siguiente pa sa ki ora nos no tin temor di Dios:
Ora nos conoce Dios, pero toch nos no ta respeta su Mandamento y Boluntad.
Ora nos nos no ta balora oportunidad cu Dios a duna nos pa sirbi Dios, y halsa su nomber.
Ora nos ta manipula otro.
Ora nos cuminsa pensa cu nos ta indispendabel, te ora cu Dios reemplasa nos.
Ora nos ta ganja otro.
Ora nos ta kere cu Dios tin mester di nos y lubida cu nos tin mester di Dios.
Ora nos ta yen di excuus pa sirbi Dios, y tur ora ta cansa pa cumpli cu Dios.
Ora nos ta bisti indecente, of sunu pensando cu ta moda, pero ta provoca otro den tentacion.
Ora nos lubida cu nos curpa ta tempel di Senjor, y ta biba, pa biba.
Ora nos ta papia palabra malo, hunto cu gritamento rabia y furia.
Ora nos ta den adulterio y fornicacion, y ta haci manera nada no ta pasando.
Ora nos ta ofende otro y no ta pidi despensa.
Ora nos sa cu nos ta robes pero toch nos no kier arepenti, y aparta di maldad.
Ora nos ta participa na inmoralidad y kier sconde e asunto.
Ora nos ta apoya sinberguenseria.
Ora nos ta iresponsabel den palabra y hecho.
Ora nos no kier cria nos yuinan,
Ora nos ta neglisha e disiplina y coreccion di nos yuinan.
Ora nos a perde respet pa nos mayornan.
Ora nos no tin tempo pa bay cas di Dios.
Ora nos no tin tempo pa haci oracion.
Ora nos ta manera nos ta cu Dios, pero nos curason a aleha for di Dios, nos ta biba di apariencia.
Ora nos ta balora placa, y material mas cu Dios.
Nos integridad ta mara na nos temor di Dios, ningun hende inmoral no por ta integro den bista di Senjor.
Proverbionan 14:26 ta para scirbi: Den e temor di Senjor tin confiansa fuerte y Su yiunan lo tin lugar di refugio.
Proverbionan 15:33 ta para scirbi: E temor di Senjor ta instruccion pa sabiduria, y prome cu honor ta bin humildad.
Proverbionan 1:7 ta para scirbi: E temor di Senjor ta e principio di conocemento, bobonan ta despresia sabiduria y instruccion.
Salmo 112:1 ta para scirbi: Bendiciona ta e hende cu ta teme Senjor, cu tin gran delisia den su mandamentonan.
Salmo 34:9 ta para scirbi: O teme Senjor boso santonan, pasobra esnan cu ta tem’E no tin falta di nada.
Salmo 25:14 ta para scirbi: E comunion intimo di Senjor ta cu esnan cu ta tem’E y e lo haci nan conoce Su aliansa.
Mateo 10:28 ta para scirbi: Y no tene miedo di esnan cu por mata e curpa, ma cu no por mata e alma,ma mas bien tene miedo di Esun cu por destrui tanto alma como curpa den fierno.
Hopi biaha ora hende ta malo drumi na cama, nan ta pidi Oracion, haci hopi promesa na Dios, nan kier biba pa wak nan yuinan y nan nietonan, y Dios ta scucha y ta manda su sanacion, pero ora nan lanta for di cama , nan ta bolbe bek na e bida bieuw y bagamunderia, esey tambe ta falta di temor di Dios.
Temor di Dios ta altamente necesario den nos bida.
Sinceramente, Pastor Marcel Balootje.