Esun cu bisa cu e ta den lus y sinembargo ta odia su ruman, ta den scuridad te ainda
Esun cu ta stima su ruman ta permanece den lus y no tin motibo den dje pa trompica.
Ma esun cu ta odia su ruman, ta den scuridad y ta cana den scuridad, y e no sa unda e ta bay, pasobra scuridad a siega su wowonan.( 1 Juan 1 9-11).
Pordon ta e arma di mas poderoso cu Dios a duna na nos, contra e trampa di diabel, pasobra pordon ta nifica obedencia na Dios, y ta nifica pas y trankilidad, y libertad pa esun cu obedece.
Di otro banda e falta di pordon ta nifica, stress, despresion, y por causa hasta problema mental pa esun cu no obedece.
Ora nos no pordona nos ruman Dios tampoco ta pordona nos, y esey ta stroba nos comunicacion y crecemento den Señor.( Mateo 6:14-15).
Falta di pordon, ta trece amargura den nos bida, nos ta bolbe bek riba cosnan bieu , cu un hende por a haci, sin nota cu door di e pensamento cu nos tin ey, nos mes no a bay dilanti, y ta draai rond manera un wiel, na mesun caminda, sin logra nada nobo, pasobra e falta di pordon ta stroba nos di avansa.
Falta di pordon ta kibra matrimonio, kibra famia, stroba educacion di yuinan,kibra negoshi,y toch tin hende ta pensa cu mientras nan tin otro wanta na curason , cos ta bon pa nan, absolutamente cu no , esey ta otro mentira di diabel pa mantene hende den scuridad.
No lubida esaki: Ma ken cu boso pordona, mi tambe ta pordona, pasobra di berdad loke mi a pordona, si mi a pordona algo, mi a hacie pa boso motibo den e presencia di Cristo , pa satanas no cohe bentaha riba nos, pasobra su trikinan no ta desconoci pa nos.( 2 Corintionan 2;11).
Reconciliacion:
Esta cu Dios den Cristo tabata reconciliando e mundo cu Su mes,sin tuma nan picanan na cuenta , y E a encarga nos cu e palabra di reconciliacion. Nos tin e deber di reconcilia hende cu Cristo, pasobra esey ta e boluntad di Dios pa tur hende tin un bon relacion cu Dios.
Tur hende tin derechi riba reconciliacion, pasobra Cristo kende no tabata conoce pica a bira pica pa nos, pa nos por a bira husticia di Dios den dj’E.( 2 Corintionan 5:19-21).
Nos pasado por tabata scur, pero ora nos reconcilia cu Dios, e claridad y e luz di Dios ta bini den nos bida, y asina nos por ta un testimonio pa otro nan.
Restauracion:
Rumannan, hasta si un hende wordo sorpresa de cualkier delito, boso cu ta spiritual, restora un hende asina den un spirito di mansedumbre, cada un wak su mes, pa boso tambe no wordo tenta.( Galationan 6:1).Pa nos restaura un persona , nos mester ta spiritual, y no carnal, pasobra cu carnalidad nos no por resolve nada, tampoco cura ningun herida, ni tampoco cu zundramento, nos no ta trece solucion, pero aplicando e amor di Cristo , y recordadando for di unda E a saca nos, nos ta cla pa yuda, pa stima, pa consola, y pa restaura otro den e amor di Cristo Hesus.
No solamente nos mester sa di coregi nos yuinan, pero ora e enemigo ataca nan , nos mester sa di restaura nos yuinan cu e palabra di Dios, y nos mester bay den presencia di Dios pa haña sabiduria di Dios pa restaura nos yuinan, pasobra hopi biaha muchanan ta permanece den nan error pa motibo cu nan mayornan no sa di restaura nan.