Desde ayera, diadomingo, redaccion di EAnews a ricibi varios notificacion relaciona cu un mensahe cu ta circula ampliamente via chatgroupnan. Den e mensahe aki ta wordo afirma cu supuestamente un turista Mericano a asesina su pareha riba dia 25 di december den un hotel situa den un edificio high-rise na Aruba.
Segun e rumor, e curpa di e victima lo tabata scondi den un closet, mientras cu e sospechoso lo tabata intentando di bandona e isla. Informacion no oficial tambe a indica cu e individuo lo tabata deteni.
Debido na e cantidad di informacion cu a yega na redaccion, EAnews a tuma contacto cu vocero oficial di polis, señora Liliana Rasmijn, cu a desmenti completamente e relato. Segun polis, no tin ningun caso asina registra, y e noticia cu ta circula ta trata di fake news.
Mas informacion cu a yega posteriormente na EAnews ta sugeri cu e rumor posiblemente a surgi for di un conflicto personal, den cual un taxista rabia, pa un motibo u otro, cu un hotel, lo a crea e historia cu e intencion di perhudica e establecimento.
Sin embargo, despues di verifica cu canalnan oficial di polis, EAnews por confirma cu e informacion aki no ta basa riba berdad y ta completamente falso.
EAnews ta haci un yamada na publico pa semper sigui EAnews y confia solamente den canalnan di noticia confiabel, pa asina evita confusion y desinformacion.