Na Boneiro tin diferente fuente di contaminacion di medio ambiente conoci, manera procesamento incorecto di sushi, candela na lanthúis (landfill) y sushi riba caya y den mondi. Entidat Publico Boneiro kier haya un bista mas cla tambe di e diferente fuentenan di contaminacion di medio ambiente, e influencia di esakinan riba ambiente di biba y riba salud di nos habitantenan.
Investigacion di parti di RIVM Den e periodo di 2025-2026, RIVM a ehecuta un investigacion exploratorio di contaminacion di medio ambiente y salud na Boneiro. E investigacion a consisti di:
- Investigacion di fuentenan existente y posible fuentenan di contaminacion di medio ambiente na Boneiro;
- Un bishita di trabou, caminda RIVM a combersa cu actornan relevante y a observa e situacion local;
- Un investigacion di percepcion, caminda habitantenan di Boneiro por a comparti nan experiencia- y preocupacionnan relaciona cu contaminacion di medio ambiente y eventual kehonan di salud pa medio di un lista di pregunta.
A compila e resultadonan den un raport cu conseho pa Entidat Publico Boneiro pa pasonan di continuacion. Desde diaranson 22 di april, e raport ta disponibel riba e website di RIVM.
Temanan di medio ambiente y e consehonan mas importante For di e investigacion, diferente tema di medio ambiente a bini dilanti cu ta pidi atencion, manera: e problematica di e centro di sushi na Lagun, calidad di awa, suelo y aire, dùmpmentu ilegal di sushi, molester di stof y zonido, y salud en relacion cu contaminacion di medio ambiente. E preocupacionnan mas grandi ta tocante e ceru di sushi cu cada bes ta bira mas grandi y e candelanan na Lagun.
Medida necesario na Lagun Hende cu ta biba cerca di e luga di deposita sushi ta experencia kehonan di salud pa hopi tempo caba. Ora tin candela, nan ta sinti benout y tin molester di tosa y dolor di wowo. RIVM ta considera importante pa riba termino corto tuma medida pa mehora e situacion, manera tapa e sushi debidamente, paga candela y evita cu nan ta bolbe surgi. Tambe nan ta conseha pa midi e substancianan cu ta bini liber den aire cu por ta dañino pa salud.
Conclusion y pasonan pa futuro Colegio Ehecutivo ta tuma e consehonan di RIVM na serio y lo delibera tocante e nificacion di e raport pa maneho y ehecucion. Meta principal ta pa reduci e impacto di e situacion riba hende, bestia y naturaleza. Entidat Publico Boneiro lo comunica di forma transparente tocante e progreso di e medidanan aki