Lady Ruth a atende dos actividad den fin di siman tray lomba. Nos no por a atende tur pa motibo
di su situacion cu su sinus. Nos sa cu nos salud ta bisa :”Vatbaar voor verkouden” y cu nos no
por sali mucho den oranan di anochi y of den serena ora e sinus ta un crenchi pisa.
Como adulto mayor nos tin cu cuida nos salud. Pero, nos a atende e 2 actividadnan den dia riba
Diasabra dia 8 di maart, Dia internacional di hende muhe. Den oranan di mainta nos a bishita
Educampus Building cu ta e ex edificio di Bon Bini Bazar den caya grandi ariba invitacion di e
simpatico hende muhe profesional cu un curason di oro “Magaly Maduro” , e dynamico
presidente di e grupo Soroptimist na Aruba y nos a goza di un bunita programa cu variacion den
arte, actuacion, poema, charla y diferente standnan. E oradornan tawata fantastico, inspira tur
hende rond di nan cu nan storia di logronan den bida cu su ups and downs. Nos flamante Miss
Universo Aruba, Anouk Eman a duna un short video presentation di su historia fei mucha den su
sport landamento sincronisa y con ela lanta bek foi su operacion di lomba yega na su
participacion den e eleccion di Miss Universo. Su amor y passion pa sincronized swimming cu a
cambia pa prepara su mes pa e certamen di Miss Universo. Sra. Natusha Croes un tremendo art
teacher su alumnonan den actuacion a presenta un obra teatral mahestral cu hopi emocion cu ta
biba den nos tur como hende muhe. Cu e toke den diferente lenga, pero comprendibel pa tur
presente. Den oranan di tray merdia, Lady Ruth a bay Hilton Hotel pa atende e di 8 of ta di 7
conferencia di hende muhe organisa pa gobierno su prome Prome Ministro Evelyn Croes cu
ayudo profesional di un di e man drechinan cu ta Sandra Croes Suarez, cu a luci masha masha
bunita mes den su bisti blanco di angel.
Esaki tambe tawata hopi impactante cu oradornan y panelistanan expresando nan retonan como
hende muhe y con nan a surpasa esakinan. Lamentablemente nos no a keda te mucho laat den
oranan di atardi y no a scucha e charla di Mininstro di Cultura Xiomara Maduro. Nos a scucha si
e charla na cuminsamento di e atardi aki di Ministro Presidente Evelyn Wever Croes cu a
comparti di su bunita curason con e ta fungi como un multifacetico den famia y trabao combina y
menciona e 4 areanan cu ta tenele den balans cu ayudo di un tremendo network. Nos a
presencia y scucha tambe e presentacion di 3 miembro di nos Parlamento Hubenil cu tambe
tawata hopi bon. Ta chispanan di 2 di e actividadnan cu Lady Ruth a atende. Nos no por a atende
e actividad e biaha aki di Centro di bario playa pabao Diabierna anochi dia 7 di maart, cu
tawatatin nos ombudsman como orador principal invita, sra Jurima Bryson, cu e tema Derecho y
trato igual pa e hende muhe. Coleganan Poeta Omaira y Lady Ari a recita varios di nan bunita
poemanan y a toka e curasonnan presente cu nan bunita inspiracion. Lady Ruth a manda un
grabacion cu poema, ya cu ta varios anja e tambe ta forma parti di e team di artistanan y poeta cu
ta duna nan bunita presentacion den CBPP. Nos a prefera di no sali den oranan di serena di
anochi ainda, pa laga e situacion di sinus calma. Leuk pa topa asina hopi hende na e
actividadnan prestigioso , organisa anualmente dia 8 di Maart. Nos a scoge tambe pa no bay
Cede di Mep den oranan di Diasabra 8 di maart anochi, pa e mesun motibo menciona di sinus.
Prome cu e fecha di 7 y 8 di maart, Lady Ruth a topa cu algun bon amigo lider scout na Ad
Patres mas o menos dos of tres siman prome, ora a bay e entierro di e kerido tata di un di nos
lidernan. Despues ta fayece tambe un di e mihor Akelanan di Aruba den tempo di su tempo, esta
sra. Glenda Diana Bareno di e bario di Piedra Plat, pero cu a fungi como lider scout den grupo
Santanero na Dakota unda ela biba pa hopi anja. Pues, atrobe tristeza man den man cu alegria.
Asina bida ta sigui lora y ta nos tur lo hanja un beurt un dia, sin sa con, e dia, e ora y of e lugar.
Mientrastanto ta bon pa nos tur sigui cuida nos salud pa rek nos tempo aki na mundo y pa nos
goza mas tanto cu ta posibel den cosnan alegre cu ta uni famia. Ban prepara nos curason pa nos
Dia Nacional, nos Dia di hymno y bandera cu ta ey mes na lorada di skina. Ah si ! Prome cu
esey, e competencianan den Poeta di Patria cu lo tuma lugar atrobe na Fort Zoutman. Ban wak si nos salud ta permiti nos bay den aire liber, asina mes cu tin tanto lugar mas gezellig y acustiek,
no ta comprende dicon Fort Zoutman. Enfin, tur cos ta pasa pa un motibo. Laga bo motibo ta gradicimento y amor pa bo Creador di amor. Dios mediante nos lo topa sea den relato of den persona. Pasa un dushi dia yen di sabiduria den nos alegria !