Como Poeta Artista di 67 primavera , Lady Ruth tambe tawata un di e dichosonan cu a ricibi un
ticket regalo pa por a bay scucha y participa na e conferencia CREACTIVO organisa pa GO
CULTURA recientemente den Renaissance Conference Center dianan 8 y 9 oktober 2024. Un
bunita gesto di un di nan patrocinadornan di curason. Y como Poeta Pintor Pensionado (Adulto
Mayor) a aprecia e gesto aki masha hopi mes. Nos ingles no ta na nivel academico, pero nos a
comprende bon locual ta enserra nos creativonan cu e.o. camindanan largo tin biaha pa ricibi
fondo pa por realisa proyectonan na bienestar di nos pilar turismo y nos mesun localnan. Nos lo
purba menciona nomber di e oradornan, y un crenchi di algo di locual algun di nan a comparti y
inspira nos tur cu ne. E caminda un crenchi complica pa yena varios formulario ta uno
responsabel, pasobra un artista no por ricibi fondo sin mas, pero tin cu duna cuenta y traha un
raport di su “Artist Fee” y na unda ela gasta y inverti su placa ricibi den su arte of su proyecto .
Esnan representa pa a papia tawata di SMAC, CEDE ARUBA, ARUBA TOURISM
AUTHORITY, AHATA. Geraldine Buckley, Daniel Tecklingburg ,Ronella Croes, Tirsa La
Sorte y e.o. tambe Luc Alofs, Mary-Ann Falconi Rasmijn, e director di Filomena College San
Nicolas Raquel Lampe cu ta un artista creativo su mes tocante arte den scol como algo essencial
y importante, Elizabeth Guanipa cu a defende nos idioma Papiamento pa ser usa den e formanan
na yega crea bo arte, e fundacion Chico Harms a wordo menciona y elogia, e proyecto di historia
di steelpan y mas. Nos mesun hendenan a destaca den nan ingles hopi bon, e.o. Ronchi de Cuba
tocante moda con ela cuminsa subi e trapi di exito, Derchelien Croes y algun mas. Un reto pa nos
oradornan sigur, pero , mirando cu nos ta un isla turistico cu lesnan den e idiomanan Papiamento,
Hulandes, Spanjo y Ingles na scol, e programa a cana hopi nechi mes cu un “ Joke in between” di
e grupo “Djies pa hari” riba screen, un grupo carnavalistanan baylando como intro di e charla di
Geraldine y riba e di dos dia un Poema di Ruthy Vrieswijk-Bergen titula CREACTIVO su
contenido na ingles dushi y simpel a la Lady Ruth. Ronella Croes y Tirsa La Sorte a papia hopi
cos bunita y interesante relaciona cu nos turismo su olanan di bayle ariba nos dushi isla. Y cu
esaki Lady Ruth kemen un chispa di e comienzo y desaroyo den e exito di nos pilar Turismo den
economia despues di Lago Oil Refinary su cierre na anjanan ochenta. Un cos ta sigur, tur
presente ta di acuerdo cu nos cultura y arte den creatividad ta mas y mas importante pa nos aki
na Aruba tambe. Nos por corda e charla amistoso y caluroso di Clara Reyes di St. Maarten cu
tema bo historia. Busca informacion di bo historia serca bo grandinan y contele. Mr. John King
di Barbados tambe a destaca den su charla y ta recorda tur creativo pa inscribi y proteha bo
derecho riba bo producto crea. Manera e producto “ musica Reagea” di Jamaica. Mr. King a
comparti cu duele na su curason, con tin cu collecta placa pa entierro di artistanan cu semper
mester a lucha pa sobrevivi na su pais. E orador di Aruba pa Lady Ruth cu mas a destaca ta Thais
Franken cu tawata den su grupo scout Kimball O’hara hopi anja pasa, un bunita mucha muhe cu
a crese y florece den un hende muhe hoben-adulto, sabi, talentoso y profesional den su trabao na
Universidad di Aruba. Ki bunita ela papia, firme cu conviccion. Manera e compas menciona pa
Ronella Croes : Curashi, Curiosidad, Compasion y Curason. Un programa Creactivo bon hinka
den otro pa su organisadornan Edjean Semeleer y Arthur Loefstok y nan team den un directiva di
Go Cultura cu ya pa anjas ta trahando cu curpa y alma pa mehora y pa proteccion di nos dushi
cultura, nos arte, locual ta authenticamente di nos, nos Dera gai, nos bailenan, nos cuminda
crioyo y hopi mas cu mas y mas ta hanja oido cu atencion. Ta imposibel comparti tur locual a
wordo cubri e dos maintanan aki den un Renaissance Conference Center cu dushi cuminda
crioyo cu excelente servicio. Por a lesa mas di dje den Diario algun dia pasa relata pa e
periodista profesional Yorlenny Oduber den extenso y na un manera mas eleva. Nos ta manera
nos planta televisor Tele Aruba, chikito, simpel, crioyo pero sofistica cu nos mesun zjeitonan,(
cu tambe tawata presente pa a transmiti y of graba e conferencia aki di Creactivo). Nos ta conclui
, felicitando Mateo Lopez cu e obra mahestralmente dramatiza, un tremendo obra skirbi pa
Arthur Loefstok cu a impacta e publico laga tur hende keto keto sin moef. Y last but not least,
nos pabien di curason cu hopi bendicion pa e curason y motor di CREACTIVO conference
Edjean y Arthur. Cu mas bon trabao y bon proyectonan cultural artistico na caminda sigur ! Un
“bearhug grandi diki gordo pa boso dos” y pa Amy y Yolanda Richardson pa nan tremendo
trabao como MC y moderador . Y pa tur nos grandinan, adulto mayor, un sunchi riba nan cabes,
den nan luna di celebracion ! No ta tur hende tin e previlegio di crese bira un adulto mayor . Sea
humilde y gradicido pa cada bendicion ! Y conta boso yuinan y nietonan boso storia pa nan por
sigui contele !
