Votadónan di Boneiru por duna un otro hende pèrmit pa vota na nan nòmber
den elekshon europeo di 6 di yüni 2024. Pa esaki e votadó huntu ku e persona ku ta vota p’e,
mester yena e parti patras di e karchi di vota. Ta posibel tambe pa laga un otro persona vota
pa bo via un formulario. Habitantenan di Boneiru ku 6 di yüni no ta na Boneiru, por vota na
Saba, Sint Eustatius, òf na Hulanda. Pa esei nan mester pidi un karchi di votadó.
Laga un otro persona vota pa bo ku e karchi di vota
E karchi di vota ta un karchi ku bo tin mester komo votadó pa vota. Pòst ta entregá e karchi
na kas. Si un votadó ke duna otro hende pèrmit pa vota p’e, mester yena e parti patras di e
karchi di vota. E votadó i e persona ku ta vota na su nòmber, ta yena e parti patras.
E votadó ta duna e persona ku ta vota na su nòmber un kopia di su prueba di identifikashon
(sédula òf pasaporte). Ta posibel tambe pa skèn e prueba di identifikashon ku un telefòn
selular. Mester mustra e karchi di vota ku a yena i kopia/skèn di e prueba di identifikashon na
e urna elektoral. Un persona ku ta vota pa un otro persona, mester hiba tambe su propio
karchi di vota i prueba di identifikashon. E persona ei mes tambe tin ku vota na e momentu
ku e ta vota pa bo.
Laga un otro hende vota pa bo via un formulario spesial
Un votadó por download e formulario akí na www.boneirutavota.com òf buska e formulario na
e departamento di Registro Sivil, Kaya Neerlandia 40. E votadó i e persona ku ta bai vota na
su nòmber, ta yena e formulario akí. Mester entregá e formulario pa mas tardá 3 di yüni 2024
na e departamento di Registro Sivil.
E votadó ta haña un prueba por eskrito di Registro Sivil ku e por vota na bo nòmber. E
votadó ku ta bai vota na bo nòmber ta hiba e prueba akí urna. E no tin mester di bai ku un
kopia di bo prueba di identifikashon.
Karchi di votadó pa hende vota pafó di Boneiru
Siudadanonan boneriano ku no ta na Boneiru ku elekshon, por vota den eksterior. Nan por
vota na Saba, Sint Eustatius òf na un munisipio na Hulanda ku un karchi di votadó. Nan por
pidi e karchi akí for di djamars 14 di mei 2024 te ku djaluna 3 di yüni. Esei por online na
www.boneirutavota.com òf via e departamento di Registro Sivil. Votadónan por pidi e karchi
di votadó tambe di djaluna 13 di mei te ku djárason 5 di yüni 2024 na e bali elektoral di e
departamento di Registro Sivil. Nan tin ku bai ku un identifikashon bálido i ta haña e karchi di
votadó mesora.
Votadó di Boneiru por duna otro hende pèrmit pa vota na su nòmber den elekshon europeo
