KRALENDIJK,Bonaire
Irvin Frans i Wernery Sambo dos kolega di otro resientemente a selebrá e echo ku binti aña pasa nan a drenta servisio di gobièrnu di Boneiru. òktober aña 1999 Frans i Sambo a kuminsá ku nan estudio pa bira ámtenar na e departamento di seguridat , Servisio Sentral di Vigilansia (SSV). Riba e fecha di 17 di desèmber mesun aña Frans i Sambo a pasa nan eksámen ku éksito, i pa 1di yanüari aña 2000 nan a bira ámtenar di seguridat asistente.
Aña 2005 Frans i Sambo a a haña e rango di ámtenar di seguridat promé klasse, durante nan trayekto den e kuerpo di SSV nan a traha na diferente instansia di gobièrnu. Na 10-10-10 nan a pasa pa e direktorado di Mantenshon di Òrdu i Seguridat komo inspektor B. Direktor di Supervishon i Mantenshon di Lei sr. Jair Tromp i Oswin Cristina hefe di departamento a dirigí palabra nan di felisitashon na e hubileonan i nan famia ku durante 20 aña a duna servisio na komunidat Boneriano. Tur dos a risibí nan sertifikado di rekonosimentu i e ènvelòp di gratitut.
