KRALENDIJK, Bonaire
Gobièrnu di Boneiru ta trahando duru pa drecha nos kareteranan,
ku fondonan ku Hulanda a pone disponibel relashoná ku e akuerdo di gobernashon.
Diputado enkargá ku infrastruktura Pablo James Kroon djabièrnè último a hasi ‘groundbreaking’ pa asina pone inisio ku drechamentu di Kaya Carlos A. Nicolaas i un parti di Kaya Jean B. Vitte.
Diputado a trese dilanti ku pa medio di e departamento di R&O ta hasi lo máksimo posibel pa bai trese kambionan pa asina e kaya por bira mas bunita i mas sigur pa tráfiko, habitantenan i e negoshinan. Ta bai drecha roinan ku betòn pa evitá ku e awa ta keda para un kaminda hasi daño na e kaminda.
Diputado a duna di konosé ku gobièrnu di Boneiru ta sumamente kontentu i positivo, ounke ku tin hopi reto mas pa nos kareteranan. Mirando ku e proyekto pa asfaltá rondó di skolnan ta andando, a parti e trabounan pa asina por kuminsá drecha Kaya Carlos A Nicolaas. Na Rincon tin sierto kamindanan ku mester di atenshon mas pronto ku ta posibel. Dentro di poko esakinan ta na turno.
Kamindanan ku ta pendiente pa drecha ta Kaya Amsterdam, Kaya Neerlandia, área di Hospital i e kaminda ku ta bai Rincon ku na e momentunan aki ta den un estado ku mester di atenshon mas pronto ku ta posibel segun diputado Kroon. Pa e motibu aki gobièrnu di Boneiru ta trahando ku Hulanda pa asina logra haña mas fondo ku ta posibel pa remediá e situashon di kareteranan.