Den conferecia di prensa di Gobierno diahuebs mainta, Prome Minister Evelyn Wever-Croes a elabora riba e acuerdo cu tin entre Hulanda y Aruba. Dia 13 di november 2020 Aruba a yega na un acuerdo cu Hulanda pa un financiamento pa e necesidadnan financiero di pais Aruba. Manera ta conoci Covid a afecta e finansas di pais Aruba enormemente y su efectonan lo dura ainda pa un tempo prome cu nan bay completamente. Pa e motibo aki, Aruba mester a busca yudansa financiero na Hulanda cu a bay di acuerdo pa financia Aruba na un interes di 0% cu cierto condicionnan cu ta stipula den e landspakket.
Gobierno di Aruba tambe a acorda luna pasa un uitvoeringsagenda na unda ta demostra con lo atende cu e puntonan den e landspakket. Ya caba aglun di e puntonan ta yegando nan deadline y gobierno tin cu cumpli cu nan. E condicionnan den e landspakket ta ser tuma hopi na serio pa Gobierno ya cu no kier core riesgo di no haña e financiamento di Hulanda.
E relacion entre Aruba y Hulanda ta uno positivo y lo desea di mantene asina. Gobierno ya tin e uitvoerings agenda di e prome kwartaal cla y lo cuminsa pronto riba e di dos kwartaal y na un forma constructivo lo sigui traha riba e cambionan cu mester tuma luga.
Pa 1 di Maart tabata tin varios tema riba e landspakket cu a ser atendi. Un di e temanan tabata e maneho financiero di cual Minister di Finansa a elabora extensivamente na unda cu mester a traha riba un inventarisacion di cual ta e leynan cu mester wordo ehecuta pa asina por fortifica e columna financiero cu ta Directie Financien, Algemene Rekenkamer, y Centrale Accountants Dienst. Esakinan ta e departamentonan cu lo mester yuda pa Aruba tin un control financiero mas estable.
Tambe a toca e tema di e gasto y eficiencia di sector publico na unda cu lo mester bin un investigacion. Te cu na e momentonan aki solamente a papia di un destaho di con e investigacion aki lo bay tuma luga. E investigacion aki lo ta riba condicion primario, secundario y terciario di trabou di personanan cu ta den servicio di gobierno.
Impuesto ta otro tema cu a ser toca na unda mester a presenta un plan di accion pa mustra con den futuro gobierno lo bay revisa y haci e reforma fiscal y bin cu un programa di cumplimento y con lo bay stimula mas hopi hende posibel pa cumpli cu e debernan fiscal cu tin. Tambe tin un negosiacion andando riba un tratado cu tin entre Hulanda y Aruba riba e Base Erosion and Profit Shifting (BEPS).
Pa e sector financierio, e leynan cu tin cu wordo haci den cuadro di evaluacion di CFATF, ta leynan cu Aruba mester tin in place contra financiamento di terosrismo y contra labamento di placa.
Riba e tema economico tabata tin solamente un punto riba agenda cu ta e ayudo humanitario den forma di cuminda. Manera ta conoci, Hulanda via Rode Kruis a tuma e responsabilidad aki y a manda un ayudo ekivalente na Awg 27 miyon. Aruba na su banda danki na donacionnan y aporte di Gobierno a logra cera un total di Awg 3 miyon pa un total di Awg 30 miyon. Hulanda awor a indica cu e kier pa Aruba tuma esaki over. Hulanda lo presta Aruba e placa y Aruba lo maneha e parti logistica y e trabou. Pa cu esaki Gobierno mester a entrega e plan di accion dia 1 di maart cual a cumpli cu ne tambe.
Tambe tabata tin un punto riba e tema di reforsa e estado di derecho, ARUMIL. Esaki ya caba Aruba pa un tempo ta trahando riba dje pa por profesionalisa y fortifica e instituto di ARUMIL y con por mehora e dienstplicht verordening. Hulanda ta dispuesto pa pone mas fondo disponibel pa esaki pero e lo mester wordo haci hunto.
“Esakinan ta e puntonan di ehecucion cu tawata riba nos agenda pa prome di maart y nos a cumpli cu nan. Awor den e dianan nos dilanti, Hulanda ta repasa e documentonan cu nos a entrega y hunto cu Hulanda nos lo defini siguiente pasonan den e proximo dianan nos dilanti”, Prome Minister Evelyn Wever-Croes a termina bisando.
