Durante e lunanan di Maart y April 2021 mayoria di e empleadonan di Aruba Airport Authority N.V. (AAA) a ricibi nan vacuna contra Covid 19.
Despues di hopi luna di comparti informacion riba e beneficionan di e vacuna cu empleadonan riba e diferente plataformanan di comunicacion interno di compania, e empleadonan di AAA a inscribi na cantidad grandi pa wordo vacuna.
Mas cu 75% di e empleadonan di AAA a ricibi nan segundo vacuna durante e fin di siman cu ta tras di lomba y 10% pa 15% lo ricibi nan segundo vacuna na comienso di Mei.
Alcansa e asina yama “herd-immunity” a demostra di ta un reto grandi pa mayoria compania, pero manera cu Angeline Flemming, Director Health, Safety and Sustainability di AAA a indica: “Nos empleadonan a reconose e importancia di e vacuna pa e recuperacion di nos isla y e rol crucial cu Aeropuerto Internacional Reina Beatrix (Aeropuerto di Aruba) tin den esaki. Nos ta hopi orguyoso di cada un di nos coleganan cu a demostra corahe y determinacion.”
No ta solamente empleadonan di AAA a inscribi na gran cantidad, pero empleadonan cu ta traha den e comunidad di aeropuerto tambe, y e siman aki tur esnan cu tin un badge di Aeropuerto di Aruba lo ricibi e oportunidad di ricibi nan vacuna tambe.
Tremendo resultado di e campaña di vacunacion na AAA
