Departamento di Impuesto, den consulta cu Minister di Finansas, ta anuncia cu ta extende e termino pa entrega e declaracion definitivo di winstbelasting 2020 cu 6 luna mas pa tur contribuyente cu no ta un instituto financiero manera banco of compania di seguro. Manera conoci, e fecha final pa entrega e declaracion menciona y haci e pago corespondiente ta 31 di mei 2021 y ta bira awor 30 di november 2021. Pa e institutonan financiero e fecha final ta keda 31 di mei 2021. Ta bon pa aclaria cu e declaracion provisional (voorlopige aangifte) no ta caduca. Por entrega e declaracion provisional durante aña.
Entrega e declaracion Pa e contribuyentenan cu tin e declaracion definitivo di winstbelasting 2020 cla promer cu e fecha final nobo, por entrega esaki na oficina principal na Camacuri. Acudi na e balie di recepcion. No mester haci un cita si ta bay entrega te cu 3 declaracion. Si tin mas cu 3 declaracion, e ora mester haci un cita online via https://www.impuesto.aw/afspraak_maken_met_DIMP.
Apesar cu a extende e fecha final cu 6 luna, Departamento di Impuesto ta recomenda tur contribuyente cu tin nan declaracion definitivo di winstbelasting 2020 cla, pa entrega esaki di awor caba pa asina por cuminsa procesa nan di biaha.