MetaCorp, e unico compania cu a traha pa 100 aña sigui na Aruba, ta masha orguyoso di a sigui cu su proyectonan di inversion durante pandemia. Prome cu e pandemia, e compania tabatin tres proyecto den pipeline. A habri Drive-In durante pandemia p’asina por a brinda servicio na comunidad di Aruba. Despues di Drive-In tabata den proceso di inversion di Gloria y a habri den pleno pandemia, asina stimulando economia y purba di trece un tiki normalidad den nos comunidad. A sigui pa nan planta di gas comercial y awo ultimo a lansa e proyecto di yena saco di cement fresco na Aruba mes!
E compania a start na 1920 den negoshi di cine, pero un par di aña despues Lago a habri y asina ATCO a nace pa brinda servicio na e refineria. Algun decada despues MetaCorp a inverti den compania di refresco, pero a sigui inverti den otro inversion cu economia y mercado di Aruba tabatin mester di dje. Despues cu Lago a cera, a inverti den hotel y di eynan a bin un planta di concret, inversion den planta di cerbes, inversion den planta pa por haci laundry p’e hotelnan. Asina a sigui inverti, unda a bin cu EcoTech cu a expande pa recicla y procesa sushi. Cu e inversionnan aki, MetaCorp semper a contribui na e economia di Aruba, asina percurando pa mas cupo di trabou y desaroyo, pero tambe a duna Arubianonan un chens di crece y desaroya nan mes.
Eddie de Veer, director di MetaCorp a splica cu na luna di maart ultimo a termina cu e proyecto di EcoGas, unda a expande e capacidad di almacena LPG, cu ta e gas necesario pa cushina den e sector comercial, pa asina por cumpli cu e demanda di mercado. E proyecto aki a encera un instalacion nobo na Barcadera, unda barconan ta yega cu gas, ta almacena e producto den tankinan grandi cu a instala riba dicho tereno. Ta transport’e pa hotelnan y restaurant cu mester di e producto aki pa nan cushina, pa keinta awa y pa uza den nan laundry.
E ulltimo proyecto cu a culmina algun siman atras ta APEX. Aki tin mashin Aleman y Frances opera p’un Arubiano. “Den pasado tabata importa cement, yudando otro economia, pero awo nos ta produci e saco di cement na Aruba. Bo sa cu e ta fresco, bo sa cu e ta produci door di Rubiano. Nos ta yudando nos mesun economia”, asina Eddie de Veer a expresa. “Awe e mainta e cement ta cayente den planta, awe tardi e ta na Do It Center y mañan e ta na bo cas unda bo por sigui cu e trabou di construccion. Mas fresco cu esaki no ta existi”
E director di e compania netamente Arubiano, cu semper a inverti na momento cu mas nos economia tabatin mester di dje, manera ta cierre di refineria y ora di recesion economico mundial, awor atrobe a demostra su rol di bon ciudadano corporativo, demostrando nan compromiso, lealtad y confiansa den Aruba. “Asina semper nos lo sigui contribui den nos economia. Semper nos a kere den inverti na Aruba. Nos lo sigui haci esey pa otro 100 aña mas”, asina Eddie de Veer a termina bisando.
