Dialuna 21 di februari 2022, Comision Fiho di Enseñansa di Parlamento a reuni cu e grupo G297. E grupo ta consisiti di sr. drs. Chando Pietersz, sr. Nelson Petronia, sr. drs. Jose de Sousa Fernandes Perna y sr. Jaime Mata (no tabata presente) kendenan tabata maestro, ex dirigente di SIMAR y ta expertonan riba tereno di enseñansa.
Despues di a keda acerca pa Grupo G297, Parlamentario Tromp-Lee, como presidente di Comision Fiho di Enseñansa, a invitanan pa un reunion.
G297 a haci un presentacion hopi interesante caminda a trata diferente puntonan y a duna conseho valioso riba algun tema. Entre otro a trata legislacion y innovacion di enseñansa, Coho/landspakket, calidad di enseñansa, relacion entre enseñansa y mercado laboral y fluho educativo progresivo.
E grupo a indica na Parlamento di kier mantene un relacion structural caminda nan ta dispuesto pa duna conseho y aporte riba e tereno di enseñansa. Nan lo desea pa logra crea un plataforma nacional di enseñansa pa traha riba diferente aspecto di Aruba su enseñansa.
Parlamentario Tromp-Lee ta finalisa bisando cu e reunion a bay hopi bon y cu e comision a keda contento cu e presentacion di G297. Mas cu claro a gradici G297 pa tur e conseho y sugerencianan duna y a palabra cu lo sigui mantene contacto y lo manda un invitacion mas den aña pa sigui elabora riba puntonan manera maneho nacional di idioma y lenga di instruccion den enseñansa