Dia 20 di juli, 2022, minister Ursell Arends a reuni cu trahadornan di Serlimar na dump di Parkietenbos. Den presencia di team di maneho, representante di raad van toezicht, representante di sindicato, y e trahadornan a scucha e preocupacionnan cu e trahadornan a expresa encuanto nan posicion laboral despues di ciere di dump, plania pa fin di aña 2022.
Entre otro e trahadornan a comparti nan miedo cu ciere di dump ta nifica perde trabou, algo cu minister Arends a informa no ta corecto. Aki ta splica cu “ciere di dump” ta nifica cu lo redirigi tur desperdicio, y asina no lo benta nada mas riba Parkietenbos. Riba e tereno di Parkietenbos, e intencion ta pa tapa e sero, y ariba di esey instala panelnan solar. Minister a splica tambe cu e proposito di Parkietenbos den su totalidad ta ensera cu ta crea oportunidadnan pa bira mas fuerte den su tarea principal di coleccion di desperdicio.
Minister ta refuta e posicion di tin e intencion pa laga e trahadornan di e dump riba caya. Di su banda desde cu ela asumi su responsibilidad como minister ela hinca tur su empeño pa rescata nos compania nacional cu ta practicamente bancarota.
Durante e reunion a duna un splicacion na tur presente riba e plan y maneho di desperdicio cu lo ta uno moderno cu ahustacionnan necesario. E meta ta pa redirigi mas hopi desperdicio posibel pa nan no yega ningun landfill y asina stimula un economia circular.
“Nos mester compronde, cu e bom di Parkietenbos a rementa hopi tempo caba. Como minister, como pueblo, como pais, nos tur mester asumi nos responsabilidad y tin un actitud habri pa e cambionan necesario.”