Comite Olimpico Arubano tabata yena di hoben entusiasma pa haya sa locual ta nos trabou na COA y sera conoci cu nos oficina nobo.
Ricibi pa Secretaria General di COA, Nicole Hoevertsz hunto cu Monica Fajardo y Jonathan Wever di Direccion di Deporte di COA e mucha nan a inicia nan recorido pafo di e oficina dilanti e renchi olimpico como tambe e pintura ilustrando diferente deporte cu ta ser practica. Na momento cu a drenta paden a sera conoci cu e historia di Weganan Olimpico, splicacion con a yega na e emblema di COA, diferente momento captura na Weganan Olimpico como tambe Regional di nos atleta nan, uniformnan uza durante e aña nan y mas cu claro e atleta nan cu ta representando nos isla den e ciclo olimpico actual, cual ta un soño di cualkier hoben pa un dia representa nos isla riba un tarima internacional den deporte.
Na final e mucha nan por a tene den nan man e diferente antorcha cu nos tin actualmente den nos oficina y pa conclui e mainta un toke unico caminda cada uno a ricibi un pin di Comite Olimpico Arubano pa recorda nan bishita na nos oficina.
