Biblioteca Nacional Aruba ta habri e Festival di Buki pa Mucha 2023 cu un fiesta na Cas di Cultura. E apertura ta tuma lugar diasabra dia 4 di november. Porta ta habri 5or y show ta di 6or pa 8or. Durante e presentacion tur mucha ta cera conoci cu tur autor di buki pa mucha y ilustrador di storia. Tambe publico ta cera conoci cu contador di cuenta!
Na 2023 e tema ta ‘Mi Buki, Mi Cas’. Tur aña ta scohe un tema nobo pa duna e festival un indole diferente. Nos ta sigui stimula mucha pa lesa. E Festival di Buki pa Mucha ta dura un siman y ta tuma lugar di dia 6 pa dia 10 di november 2023.
Den siman di 6 pa 10 di november hopi autor tanto di Aruba como for di Hulanda, Corsou, Boneiro y St. Eustatius ta bishita mas cu 50 scol. Y atardi tambe tin presentacion na biblioteca na O’stad y San Nicolas. Di e manera aki nos ta entusiasma muchanan pa lesa mas, lesa hunto y bishita biblioteca mas. Miembrecia di biblioteca a bira gratis na 2023, cu ta un regalo pa tur mucha. Riba website di biblioteca tin mucho mas informacion di cada autor y ilustrador.
