Diadomingo marduga, riba e di dos anochi di e festival, Aruba a conoce su Power Soca King 2024 di Carnaval 70. Un total di 15 banda y 27 cantante a participa den categoria Power Soca. Minister Endy Croes y colega Minister Xiomara Maduro tabata presente na Aruba Carnival Village pa duna sosten y apoyo n’e musiconan y pa engrandece e festival. Den careda di 3 or di marduga Stichting Musica a anuncia e ganadonan di e anochi. Minister Endy Croes hunto cu colega Minister Xiomara Maduro tabatin e honor pa entrega e premionan n’e ganadonan di Power Soca 2024. E ganado absoluto di Power Soca 2024 ta Carl Roosberg Jr. (Galloway) di e banda Tsunami. Na di dos luga a resulta Carlmichael Richardson (M.I. K.E.Y.) di e banda Youth Xtreme y trecer luga a bay pa Bradley Vesprey (Easy B) di e banda Tsunami. E premio di Rookie of the Year a bay pa Agmyr Vesprey (Big Reckless) di e banda Tsunami. Tsunami a bay cu mayoria premio e anochi aki. Pa conclui, Minister Endy Croes ta felicita Stichting Musica pa organisa Aruba Caiso y Soca Monarch 2024. Alabes e mandatario di Enseñansa y Deporte ta felicita tur musico y cantante cu a briya riba escenario y ta gradicinan pa deleita Pueblo di Aruba cu nan excelente canticanan. Minister Endy Croes ta desea Aruba un dushi temporada di Carnaval 70. Ban celebr’e conscientemente. Pabien na e ganadonan!
