Kuater siman tras di otro ta bingo pa Zr.Ms. Holland. E barku Marinero Hulandes riba djamars 24 di sèptèmber, pa di 5 biaha, a interseptá un boto ku droga. Un total di 2.285 kilo di droga a keda konfiská i 5 kontrabandista a keda detené.
Den oranan tempran di mainta riba djamars 24 di sèptèmber e avion patruyero Dash-08 di Wardakosta Region Karibe a mira un boto sospechoso ta nabegá den besindario di islanan ABC. Zr.Ms. Holland mes ora a drenta akshon, manda su botonan rápido di intersepshon den direkshon di esaki i a obligá e boto pa stòp, tirando dirigí riba e motornan di e boto.
Sinku kontrabandista di droga a keda detené i un total di 1.865 kilo di kokaina i 420 kilo di mariwana a keda konfiská. E droganan i e sospechosonan a keda entregá na Wardakosta Merikano pa persiguishon na Estados Unídos.
Zr.Ms. Holland for di kuminsamentu di sèptèmber ta aktivo komo barku patruyero den region Karibe i durante operashonnan anti droga ta traha den interkambio huntu ku Wardakosta Merikano i Wardakosta Region Karibe. Dentro di un luna di tempu ya Zr.Ms. Holland a konfiská mas ku 7.750 kilo di droga.
