Ora nos lesa den e e cuater buki nan di Evangelio , especialmente locual ta para scirbi den e evangelio
segun Lucas a scirbi,nos por aprecia y reconoce, cu e Nacemento di nos Señor Hesus tabata algo hopi
grandi y te awe e ta e nacemento di mas importante cu por a existi riba e mundo.
Locual hopi hende no sa, ta cu Lucas no tabata un apostel.( Mateo 10:2) pero si e a scirbi tur locual e a
tende di e grandesa di e bida di Cristo Hesus for di Su Nacemento, Bida , Milagernan
,Sufrimento,Morto ,Resureccion y Subimento na cielo cu tur luho y detaye pa nos tur compronde con
grandi nos Dios ta,
Tur cos a sosode den Humildad , Respet y Decensia.
Nos ta cuminsa for di e anuncio di nacemento di Juan , con un angel di Señor a parece, pa bisa
Zacarias y Elisabeth,( Hendenan humilde y ireprochabel ) cu Dios ta bay duna nan un yiu , aunke nan
edad tabata hopi halto.
Y tur locual ta bay sosode, hasta cu e yiu lo wordo yena cu Spirito Santo for di den barica di su mama
( Lucas 1:11-28). Zacarias no kier a kere, y e angel mester a identifica su mes cu e ta Angel Gabriel cu
ta para den presencia di Señor y a wordo manda, pa papia cu Zacarias y trece bon nobo pa Zacarias.
Y pasobra Zacarias no a kere cu e palabra di Dios lo wordo cumpli na su debido tempo, Zacarias a
keda muda te dia cu Juan a nace.
Aki nan tur hende por mira kico ta pasa ora hende ta duda, of no ta kere den locual Dios ta bisa.
Dios ta misericordioso aunke nan no a kere toch e milager a tuma lugar pa demostra cu pa Dios nada
lo no ta imposibel.
Dios ta stima hende humilde, y Dios ta usa hende humilde den tur cos, e ta halsa esun cu ta humilde,
pero e ta mira e orguyoso di lew, pasobra Dios no kier tin nada di haci cu hende orguyoso, cu no ta
respeta, y ta haci bofon di e palabra di Dios, cu no tin temor di Dios y ta yega asina asina lew di
cambia berdad pa mentira.(Proverbionan 6:16-19)
E anuncio di e nacemento di Hesus, a tuma lugar den un forma masha respetuoso, ora cu Angel
Gabriel a wordo manda door di Dios den Galilea na un stad cu yama Nazaret.
Aki nan cosnan sobrenatural cu solamente Dios por haci a cuminsa tuma lugar.
Cosnan cu a wordo profetisa door di Profeta Isaias mas cu 750 aña cu Hesus a nace.
Isaias 7:14 ta para scirbi: Pesey Señor mes lo duna boso un señal, mira un birgen lo sali na estado, y lo
haña un yiu homber y e lo duna e nomber Emanuel.
Tanto Maria como Hose tabata hende humilde, decente y di respet, pasobra Dios ta wak curason di
hende prome cu e pone encargo riba hende, ta notabel cu hopi biaha hende kier sirbi Dios,hende kier
haci hopi cos, pero nan curason no ta recto cu Dios.
E curason mester ta recto cu Dios , pa asina Dios ricibi tur e Gloria, y esey a pasa den bida di Maria y
Hose, Hose tabata asina humilde cu sabiendo cu e yiu no ta di dje a tuma su encargo cu humildad.
Celebracion di Pasco di nacemento, no ta un temporda di bochincha,buracheria y accidente.
Pero un fiesta di famia , di paz y di goso, pasobra nos Rey a nace.
Sinceramente Pastor Marcel Balootje.