E partido PVV di lider Hulandes Geert Wilders a bandona e coalicion di gobierno ayera, den un movecion cu ta prepara pa derota e gobierno y probablemente lo conduci na eleccion nobo.
Wilders a bisa cu su partnernan di coalicion no tabata dispuesto pa sostene su ideanan pa stop migracion di asilo.
“No tin firma bou di nos plannan di asilo. E PVV ta bandona e coalicion”, Wilders a bisa den un post riba X.
Wilders a bisa cu el a informa Prome Minister Dick Schoof cu tur minister di su partido PVV lo bandona e gobierno. Schoof ainda no a reacciona riba e retiro.
Wilders su sorpresa ta pone un fin na un coalicion ya fragil cu a lucha pa yega na un consenso desde su instalacion na juli ultimo.
Probablemente e lo trece eleccionnan nobo den algun luna, agregando na e incertidumbre politico den e di cinco economia mas grandi di e zona di euro.
Probablemente e lo retrasa tambe un decision riba un aumento posiblemente historico den gastonan di defensa pa cumpli cu e metanan nobo di NATO.
Y e lo laga Hulanda solamente cu un gobierno interino ora cu e ta ricibi lidernan di paisnan di NATO pa un cumbre pa dicidi riba e metanan aki na Den Haag mas laat e luna aki.
E partnernan di Wilders den su coalicion a reacciona rabia.
“Esaki ta haci nos parce un bobo”, lider di e partido conservador VVD Dilan Yesilgoz a bisa. “Tin un guera riba nos continente. En bes di ricibi e reto, Wilders ta mustra cu e no ta dispuesto pa tuma responsabilidad”.
“Esaki ta increibel”, lider di e partido NSC di centro, Nicolien van Vroonhoven a bisa. “Ta iresponsabel pa derota e gobierno na e momento aki”.
Sin PVV, e otro partidonan tin e opcion teorico pa purba y sigui como un gobierno minoritario. No ta spera di nan, y nan no a confirma esaki ainda.
Wilders a gana e eleccion mas reciente na Hulanda, pero encuestonan reciente ta mustra cu el a perde apoyo desde cu el a drenta gobierno.
E encuestonan awor ta pone cu su partido tin alrededor di 20% di e votonan, mas o menos na par cu e combinacion di Labor/Green cu actualmente ta e di dos mas grandi den parlamento.
Wilders siman pasa a pidi sosten inmediato pa su proposicionnan pa stop migracion di asilo completamente, manda refugiadonan sirio bek na nan pais di origen y cera casnan di asilo.
E partnernan di coalicion no a acepta su idea, y a bisa cu ta na e minister di migracion di Wilders su propio partido pa traha riba proposicionnan specifico. Wilders mes no tabata parti di e gobierno como su lider of un minister.
El a wordo condena pa discriminacion despues cu el a insulta Marokonan durante un manifestacion di campaña na 2014 y el a logra yega na un acuerdo di coalicion cu tres otro partido conservador aña pasa despues cu el a renuncia na su candidatura pa bira prome minister.
Na luga di esey, e gabinete tabata dirigi pa e independiente y no eleha Schoof, un burocrata di carera cu a lider e agencia di inteligencia Hulandes AIVD y tabata e funcionario senior na ministerio di husticia.