Corendon Curaçao a forma un alianza ku At Your Service (AYS) pa lansá un programa grandi di entrenamiento pa mas ku 200 trahado. Ku e inisiativa aki, Corendon – e empresa mas grandi den
sektor di hospitalidat na Kòrsou – ke sigui reforsá e nivel di servisio i eksperensia di huésped, i duna su personal mas abilidat profesional.
E programa ta konsistí di dies lès, dividí den dos direkshon: un entrenamiento general di hospitalidat i un kùrsus pa bartender. E entrenamiento ta enfoká riba eksperensia di huéspeden, aparensia profesional, interakshon ku huéspeden, trabou di ekipo, respeto i konosimentu spesialisá den hospitalidat. Tambe tin atenshon pa abilidat prátiko, situashon real den trabou i konseho ku e empleado por apliká di inmediato.
“Ku e kolaborashon aki nos no solamente ta duna nos empleado mas konosementu, sino tambe ta garantisa ku nos huéspeden ta risibí un eksperensia mas kaluroso i mas professional na Korsou,”
segun Atilay Uslu di Corendon.
E entrenamiento ta wordu duna pa At Your Service, ku ta spesialisá den rekutamentu i entrenamiento den sektor di hospitalidat na Kòrsou. Komo e úniko formadó rekonosí den Karibe,
partisipanten por risibí un sertifikado rekonosí pa SVH, ku tin hopi balor den e industria.
Ron van der Velden, gerente di At Your Service: “Nos ta hopi orguyoso ku Corendon a pone e
konfiansa riba nos pa duna e programa grandi aki. Hunto nos ta konstrui na un standard mas haltu di hospitalidat na Kòrsou.”
E promé entrenamiento lo kuminsá den sèptèmber 2025.
Riba portret di robes pa drechi: Elianne Eissens (Hefe di formashon na At Your Service), Biray Ogut (direktor general di Corendon Hotels), Ron van der Velden (fundador di At Your Service) i Atacan Uslu (Miembro di maneho di Corendon Hotels).
