Den un konfeshon publiko demasiado lat, pero finalmente , lidernan politiko di Boneiru resientemente a admití loke hopi siudadanon ya sa pa añjos: nan no tin poder real. For di 10 di òktober 2010 (10-10-10), ta e gobierno Hulandés na Den Haag ta disidí riba lei i desishonnan ku ta afektá Boneiru, Sint Eustatius i Saba , e asina yama islanan BES.
E pèrdida di autonomia no a kuminsá resientemente, manera algun lider polítiko ta purba pinta awor, pero ya for di 2010, ora e isla a wordu pone bek bou di kontrol di Den Haag ku hopi ta konsiderá komo ilegal i kolonial. Esaki ta motibu ku James Finies a kuminsá kampaña ya for di 2012 kontra i pa no vota den elekshonan Hulandés — komo protesta kontra un struktura polítiko impone ku pueblo di Boneiru a rechasa den referéndum.
Partisipá voluntariamente den un sistema ku ta wordu konsiderá ilegal, ta solamente sirbi pa legitimá e violashonnan di derecho demokrátiko di e pueblo.
E situashon a empeorá na 2017, ora polítikonan lokal a presentá un moshon i a aprobá esaki den Konseho Insular di Boneiru, duna green light, bai di akuerdo pa e 1ste kamer i 2de kamer Hulandés pa ankra Boneiru den Konstitushon Hulandés. E yamada di Sr Finies pa boikot elekshon Hulandes a kontribuí na un kaída grandi den partisipashon di votadonan — ku normal ta alrededor di 80% pa ménos ku 30% — komo un forma di protesta kontra e kontinou opreshon polítiko.
E úniko manera pa drechá I solushona e situashon aki ta tene e gobierno Hulandés internashonalmente responsabel i pone Boneiru bek riba e Lista di Teritorionan Sin Propio Gobernashon di Nashonan Uni. E direkshon pa futuro ta kla I sierto: ora Boneiru wordu pone bek riba e lista, Hulanda lo tin obligashon pa raporta na komunidat internashonal i Asamblea General di Nashonan Uni tokante desaroyo i bienestar di pueblo Boneiriano — ekonomikamente, sosialmente, polítikamente, kulturalmente i edukativamente.
Pa sostené e esfuerso aki, na 2018 James Finies a solisita I kontrata un eksperto internashonal di Nashonan Uni pa hasi un evaluashon di e nivel di propio-gobernashon di Boneiru, den konformidat ku standardnan internashonalmente rekonosí. E rapòrt aki ta rekonosé i uzá pa Nashonan Uni komo un evaluashon independiente, pasobra e ta inkluí indikadornan di propio-gobernashon ku a wordu establesé i aprobá pa e Asamblea General di Nashonan Uni.
Pueblo di Boneiru meresé su derecho kompleto na autodeterminashon — no palabranan bashi for di mesun lidernan ku a yuda mina I entrega esaki. Pone Boneiru riba e lista di Nashonan Uni di Teritorionan Sin Propio Gobernashon ta un medida di protekshon disenyá pa garantisa derechonan i interes di pueblo di Boneiru — meskos ku ta protehá tortuga, ref di koral, flamingo i karko.
Islanan similar chikí manera Virgin Islands, Merikano i Britániko, Bermuda i Cayman Islands den Karibe ku ta riba e lista, tin nivel di bida hopi mas haltu, ku GDP, produkto nashonal bruto ku ta por ta hasta sinku biaha mas haltu ku Boneiru. Den e islanan ey, hendenan lokal ta na kabes di institushonnan, nan tin poder real, i ta disidi nan propio direkshon I desaroyo — no bou di dominashon estranhero, sino ku supervishon di Komishon Spesial di Dekolonisashon di Nashonan Uni (C-24) i mekanismonan internashonal di Derecho Humano.