Minister di Finansa, Asunto Economico y Sector Primario, mr. Geoffrey Wever, a ricibi oficialmente e relato anual 2024 di FIU Aruba for di director, señor Angelo Brete. E relato a wordo publica un tempo pasa, pero diahuebs ultimo a duna Minister Wever un presentacion di e relato y a haci e entrega oficial. Segun Sr. Brete, e esencia di trabao di FIU Aruba ta pa contribui na integridad di nos economia. Integridad ta nifica pa tin un bon economia, pasobra e ta crea confiansa, ta atrae inversion limpi, locual ta sostene crecemento duradero.
Unidad di Inteligencia Financiero di Aruba, FIU Aruba, a duna Minister Wever un resumen strategico di loke FIU Aruba a logra durante 2024, entre otro e cantidad di reportenan inusual ricibi, typologia y desaroyo den e mundo di labamento di placa, desaroyo operacional di e unidad y su prioridadnan pa futuro. E relato anual ta presenta e esfuerso continuo di FIU Aruba pa fortalece integridad di nos sector financiero, nos sector no-financiero y pa amplia cooperacion na nivel nacional y internacional.
Minister Wever a enfatisa importancia di e rol esencial cu FIU Aruba tin den e marco amplio di prevencion y combatimento di crimen financiero na Aruba. Minister Wever a sigura cu Gobierno di Aruba ta compromete su mes pa sigui duna sosten structural na e esfuersonan riba e nivel aki pa proteha nos economia y pa salvaguardia e bon nomber internacional di nos pais.
FIU Aruba a haya elogio pa su profesionalismo, envolvimento regional y internacional cu claramente ta wordo refleha pa medio di su resiliencia operacional den un mundo den cual esnan cu mal intencion mayoria biaha tin hopi mas medio financiero cu e sector publico, pa por sigui inverti den sistemanan moderno pa evadi reglanan. Minister Wever ta haci un yamada na tur entidad cu tin obligacion pa reporta transaccionnan inusual pa compronde e proposito di e reglanan y pa compromete nan mes pa sigui traha pa mehora e calidad di informacion cu nan ta deposita cerca FIU Aruba. Tambe Minister Wever ta gradici den nomber di Gobierno di Aruba, tur instancia cu ta forma parti di e cadena di prevencion y combatimento di labamento di placa, pa nan colaboracion ya cu Minister Wever a compronde cu esaki ta bayendo den bon dirreccion. Ta esencial pa tur stakeholder compronde nan rol, no mira compliance cu AML/CFT como un obligacion, pero compronde su proposito pa Aruba por tin un economia integro.
E relato anual di nos Unidad di Inteligencia Financiero, ta demostra cu e ta cumpli cu e rol vital cu e tin. Tin varios otro instancia den sector priva y publico cu ta forma parti di e cadena pa preveni y combati crimen financiero y ta esencial cu cada un ta reconoce nan propio tarea den esaki pa asina nos por cumpli cabalmente cu e ley, cual ta e Ordenansa pa preveni y combati labamento di placa, financiamento di terrorismo y financiamento di proliferacion di armanan destina pa destruccion massivo.
Minister Wever a finalisa, cu e reafirmacion cu gobernacion ta compromete su mes pa reenforsa nos cuadro legal na unda mester y pone recursonan disponibel segun e forsa financiero di nos Pais, pa garantisa cu Aruba por sigui atende e desafionan riba e tereno aki. Por lesa of descarga e relato anual 2024 di FIU Aruba for di website: https://www.fiu-aruba.com/download/annual-report-2024/
Press release: Gobierno di Aruba
