Stichting Schouwburg Aruba, e fundacion tras di Teatro Nacional di Aruba – Cas di Cultura – oficialmente a haya e status di ANBI (Organisacion di Beneficio Publico). E reconocimento aki ta marca un logro importante den crecemento y profesionalisacion di e organisacion.
Na Hulanda e status di ANBI ta wordo otorga exclusivamente na organisacionnan cu a demostra di promove e interes publico. E designacion aki ta confirma cu e trabou di Stichting Schouwburg Aruba ta aporta na desaroyo social, cultural, y educativo dentro di e comunidad Arubano.
Pa Cas di Cultura, esaki ta fortifica su posicion como e plataforma cultural principal na Aruba. Status di ANBI ta ofrece confiansa adicional na partnernan, donantenan y fondonan, ya ku e ta garantisa cu e fundashon ta opera transparentemente, ta conduci su organisacion financieramente prudente, y ta usa su recursonan pa su mision cultural. Ademas por haci contribushon di donantenan y fondonan Hulandes cu mas beneficio fiscal, expandiendo significantemente e posibilidadnan pa patrocinio y invercionnan cultural.
“Otorgamento di status di ANBI ta un paso valioso pa nos organisacion”, segun Stichting Schouwburg Aruba. “E ta sostene nos ambicion pa modernisa Cas di Cultura, haci’e mas sostenibel, y sigui desaroy’e como un luga unda arte, cultura, y educacion ta bini hunto pa tur residente di Aruba.”
Cu e perspectiva di e renobacion na gran escala y ampliacion di programanan y partnershipnan, e reconocimento den e forma di e seyo aki, ta brinda un fundeshi fuerte pa futuro di Cas di Cultura.
Por haya mas informacion tocante Cas di Cutlura como organisacion y tocante e renobacion riba e website casdicultura.aw.