Ta imposibel pa nos tin pas, si nos ta pone candela, contra candela, palabra negativo contra palabra
negativo ta causa tension y ta trece violencia, esey ta e plan di enemigo, pa asina distrai hende for di e proposito di Dios.
E prome stap cu nos mester dal ora nos kier vence maldad, nos mester pordona, laga cosnan bieu bay, kibra cu orguyo, kibra cu materialismo,stop di papia malo( Efesionan 4:29-30), sea un ehempel di pas y trankilidad,sea un lus den scuridad pa esnan cu ta den negativismo.
Den tur forma evita cudishi y envidia, no kibra otro, y no stroba otro,especialmente den bo cas
mantene pas.
Redu ta locual a destrui hopi amistad, hopi matrimonio, y hopi famia, redu ta un vehiculo special cu
diabel ta usa pa trece division tur caminda, tin cierto departamento cu no ta funciona bon pa motibo di redo, colega contra colega, y mas pio ta ora redu ta den cas, caminda mama cu yiu ta haci redo riba tata of vice versa of ruman ta haci redo riba ruman,of mayornan ta stima un yiu mas cu otro.Tur e cosnan ey ta bini for di malicia diabolico, cu tey solamente pa horta, pa mata y pa destrui.
Un hende cu ta rabia lihe ta lanta pleito, ma esun cu no ta rabia lihe ta calma pleito.( Proverbionan
15:18).
Un hende perverso ta coba saca maldad,y su palabranan ta manera candela tur na vlam.( Proverbionan 16:27) Un hende perverso ta sembra pleito, y un hacido di redo ta separa amigonan intimo,( Proverbionan 16:28), Tres prueba pa nos por sa con nos tin cu evita pleito y discucion, pasobra Dios a yama nos pa stima otro,y no pa kibra otro.
Ta importante pa nos como mayor educa nos yuinan den e caminda di pas, y splicanan bon cla cu den pleito,violencia y enemistad, no tin ganashi,no tin nada spiritual, solamente un aumento di amargura, cual no ta bon pa ningun hende.
Si ta posibel asina leu cu ta depende di boso, sea na pas cu tur hende.(Romanonan 12:18).
Tene bon na cuenta esaki: Aspira pa tin pas cu tur hende y santificacion, sin cual ningun hende lo no
mira Dios.( Hebreonan 12:14).
Prudencia di un hende ta haci cu e no ta rabia lihe, y pa laga un ofensa pasa ta su gloria.( Proverbionan 19:11).
Laga bo mente ta un mente fructifero y creativo, no bay tras di palabra cu hende ta papia pa kibra bo, pero wak e palabra di Dios cu tey pa halsa bo, pa duna curashi, pa sinja bo perservera.
Semper humildad ta hala hende serca Dios, pasobra Dios ta stima hende humilde, pasobra hende
humilde ta laga nan mes wordo usa door di Dios, hende rebelde semper tin excuus, semper nan ta sinti nan mes cansa y no tin tempo pa haci locual Dios kier pa nan haci, pasobra e enemigo tin nan mente manipula.
Nos confiansa den Dios, ta yuda nos vence tur obstaculo, tur trampa di e enemigo, pasobra e enemigo ta gusta biba den pasado, gusta falta di pordon, e ta gusta discriminacion y tur locual e por pone hende rabia cune, pasobra esey ta su funcion, pasobra e diabel sa cu hende rabia y amarga no por funciona , ni tampoco alaba, pa asina tin contacto berdadero cu Dios.
Den nos curason no tin lugar pa rabia, odio, violencia, tur cosnan ey ta stroba e bon funcion di nos
curason, pasobra hopi hende ta birando malo, pasobra nan curason ta carga, y nan mente ta cansa,y
nan no tin pas. Ban vence malo cu bon awe.
Pastor Marcel Balootje.