Minister di Finansa, Asuntonan Economico y Sector Primario, mr.
Geoffrey Wever, ta anuncia e nombramento di e presidente nobo di Banco Central di Aruba
(CBA). Despues di un trayectoria largo ehecuta y lidera pa e Raad van Commissarissen di Centrale
Bank, awe mainta, durante un rueda di prensa, Sr. Thomas Domhoff a wordo introduci como e
presidente nobo di Banco Central di Aruba.
E nombramento aki ta sigui un trayectorio largo y extensivo, lidera y ehecuta pa e Raad van
Commissarissen di Banco Central di Aruba, bow di gia di Sr. Arie Swaen. E Raad van
Commissarissen, como organo independiente encarga cu supervision strategico di Banco Central
di Aruba, a maneha e proceso completo di buskeda y seleccion. Esaki a inclui colaboracion cu un
experto externo pa establece e perfil pa cu e posicion, asina como e proceso di aplicacion,
evaluacion y screening di candidatonan, tur bao responsabilidad y liderazgo di e Raad van
Commissarissen di Banco Central di Aruba.
E miembronan di e Raad van Commissarissen tin hopi aña di experiencia y profundo
conocemento di e organizacion, y a wordo establece varios aña atras. A base di nan evaluacion
profesional y criterio independiente, nan a selecciona Sr. Domhoff como e candidato mas adecua
pa lidera e institucion den su siguiente fase y basa riba e recomendacion aki Minister Geoffrey
Wever a nombra Sr. Domhoff como Presidente di Banco Central di Aruba pa un periodo di 5 aña.
E transicion aki ta marca un momento significativo pa Banco Central di Aruba, despues di casi
binti aña di liderazgo di Sra. Jane Semeleer. Den december 2025, Sra. Semeleer a retira oficialmente,
lagando atras un legado remarcabel, no solamente como e prome hende muhe pa ocupa e posicion
di Presidente di Banco Central di Aruba, sino tambe pa su liderazgo firme durante periodonan di
reto economico global y desaroyo financiero importante pa Aruba y pa tawata responsibel pa
mantene e stabilidad di e Florin Arubiano.
Sr. Domhoff ta un ehecutivo cu mas di 30 aña di liderazgo den sectornan di banco, finansa,
agricultura y educacion, tanto na Aruba, Curaçao, y internacionalmente. E a ocupa varios
posicionnan di alto nivel, y recientemente a ocupa e posicion di CEO di GI-RO Settlement
Holding N.V. (GSH), na Curaçao. Su experiencia amplio, liderazgo strategico y enfoke riba
innovacion y capital humano, lo contribui na fortalece e rol di Banco Central di Aruba como pilar
di stabilidad financiero y confiansa economico. E meta di Sr. Domhoff ta pa contribui na un
Banco Central di Aruba robusto, transparente y orienta pa futuro, cu ta inspira confiansa, fomenta
innovacion financiero, y contribui na desaroyo economico sostenibel di Aruba y pa establece un
relaciona profesional y habri cu e sector financiero di Aruba.
Minister Wever ta aprecia e proceso independiente y e rol fundamental di e Raad van
Commissarissen den e decision aki, y ta reconoci e importancia di gobernanacion solido y
transparente den institucionnan clave manera e Banco Central di Aruba, unda no tin lugar pa
politica partidista.
Minister Wever ta yama un bon bini na Sr. Thomas Domhoff y ta desea Sr. Domhoff tur clase di
exito den e ramo nobo aki pa hiba e institucion importante di Banco Central di Aruba dilanti den
un fase nobo.
