Aruba ta den gara di un maneho unda propaganda ta bin prome cu proteccion. Den un intento pa posiciona e coalicion AVP-FUTURO como e “salbador” di e sistema, Minister Gerlien Croes hunga un politica sushi, desmantelando structuranan vital djis pa por rebendé nan como idea nobo, mientras e consecuencia di e paralisacion aki ta wordo sinti den e camanan di hospital.
Leccionnan di Pasado cu a wordo Sabotea
Comunidad di Aruba no por lubida e trauma di e casonan di Richandro y Eugene. E tragedia ey tabata e motibo pakico e gobierno anterior (MEP) a actua cu urgencia pa structura e Departamento di Mucha y Hoben (DMH). E meta tabata cla: asumi e responsabilidad cu pa mas di 20 aña a wordo ignora, garantisa e implementacion di e ley di centro di cuido y percura pa e Meldcode den Codigo Civil wordo aplica debidamente.
Sinembargo, cu e cambio di mando, Minister Gerlien Croes a opta pa un caminda peligroso. En bes di duna continuidad na un departamento cu ya tabata cla pa ehecuta, e mandatario a scohe pa “doek op” (desmantela) proyectonan den marcha. Esaki no ta simplemente un diferencia di opinion, esaki ta un sabotaje administrativo pa interesnan partidista.
Desmantela pa Despues ‘Re-inventa’
E tactica den e pasionan di Cocolishi ta obvio: Minister Croes ta critica e trabou di su predecesor, categoris’e como deficiente of mal traha, pa despues bin cu e mesun structura bou di un nomber nobo of bou di e bandera di FUTURO. E engaño aki ta costa tempo precioso.
Mientras e Minister ta perde tempo den re-inventa loke ya tabata existi, e supervision riba centronan di cuido a drenta den un abismo. E resultado? Un criatura di 5 aña luchando pa su bida na Colombia despues di a keda lubida den un transporte. Esaki no ta un fayo di e sistema per se, sino un fayo di e liderazgo cu a para e machine di control pa por hunga politica.
Uso di Recurso y Falta di Vision
E “politica sushi” aki tin un prijs halto:
- Malgasto di Recurso: Desmantela y bolbe lanta e mesun cos ta costa placa di pueblo.
- Paralisacion Administrativo: Trahadonan publico y expertonan ta keda den incertidumbre mientras e Minister ta dicidi con pa haci e proyecto “di dje”.
- Seguridad den Peliger: Cada dia cu e ley di centro di cuido no wordo ehecuta pasobra e Minister kier “cambia nomber”, ta un dia mas cu nos muchanan ta core riesgo.
Conclusion: Un Fachada cu Consecuencia Real
E mentalidad di Minister Gerlien Croes ta mustra un falta di vision nacional. Proteccion di mucha no mester tin color politico. Si e gobierno anterior a laga un base cla, e deber di un minister responsabel ta pa fortific’e, no bor’e pa skirbi su propio nomber riba e muraya.
Aruba no por permiti pa e bida di nos muchanan wordo uza como piesa di intercambio den un campaña di imagen. E “wega di payaso” aki mester para prome cu un otro tragedia sacudi nos isla. Pueblo ta exigi accion, supervision real y transparencia, no mas propaganda cu holó di oportunismo.