Diferente servicio di emergencia a wordo mobilisa diahuebs anochi despues di un explosion na e oficina nacional di partido D66, situa den Lange Houtstraat.
Na yegada, autoridadnan no por a drenta e edificio mesora. Segun informe inicial di polis, tabatin sospecho cu por tabatin un persona herida paden. Debí na esaki, polisnan a purba di habri e porta principal na forsa. Cuerpo di Bombero tambe a wordo avisa pa un ‘posibel candela’ y nan a presenta na e sitio pa facilita entrada na e edificio.
E impacto tabata tal cu e baki di post a bula for di e porta y a termina na e otro banda di caya. Vocero di polis a confirma cu en berdad un explosion a tuma lugar den e oficina. Aunke tin daño material leve, no tin ningun persona herida. E temor cu tabatin un hende den e edificio a resulta di ta infunda; no tabatin niun hende presente na e momento ey.
Bisiñanan a reporta di a scucha un zonido fuerte sigui pa e zonido di obhetonan cayendo, despues di cual nan a bati alarma. D66 a confirma entretanto cu tur indicacion ta apunta cu a tira un bom di vuurwerk drenta den e edificio. Kisas un atentado ? esaki te ainda no a keda oficialmente confirma. Testigonan a mira un persona huy for di e sitio. Polis a instala un asina yama ‘hekkenwagen’ pa sera e area rond di e edificio pa investigacion.
