Ora un mucha no ta respeta su mayor, ta algo di berguensa, pasobra sea e mal comportacion ta bini di
su mayor of e mucha tambe porta rebelde.
Pero ora ta trata di Dios Tata Todopoderoso, eynan si nos tin cu para keto un rato y pensa, pasobra tur
hende cu no ta respeta, reconoce e palabra y grandesa di Dios, lo pasa den situacion dificil, pa nan
reconoce ken ta Dios.
Pasobra laga nos wak bon, si un hende no ta kere den Dios, ta den ken e ta kere anto? Hende por bisa
cu e ta liber pa kere den loke e kier, pero tuma tempo y pensa si tin speransa pa esun cu no ta kere den
Cristo Hesus, pasobra esey a wordo estableci pa Dios mes , pa hende kere y ricibi bida eterna, of keda
sin kere y ta condena caba, pasobra e hende no a kere den e Yiu unigenito di Dios.( Juan 3:16).
E falta di respet pa palabra di Dios ta aumentando tur caminda, hende no kier reconoce Dios, nan ta
mira Su grandesa y mira Su poder, pero te ainda no somete nan mes na Dios.
Wak e consecuencia cu tabatin for di principio pa Adam y Eva, y cu te awe nos por mira kico pica y
maldad ta haci riba mundo.
Wak e consecuencia di Sarah y Abraham,
Wak e consecuencia cu tabatin pa Lot,
Wak e consecuencia cu tabatin pa Jonas,
Wak e consecuencia di Sodoma y Gomora,
Wak e consecuencia pa rey David y su cas,
Wak e consecuencia pa Acan,
Wak e consecuencia pa Ananias y Safira.
Y por ultimo nos tur sa e consecuencia cu ta bini pa e mundo aki , segun ta para scirbi cla den 2 Pedro
3:7.
Hendenan ta biba den nan orguyo y falta di respet pa Dios, Dios su presencia tey tur caminda, Dios ta
mira tur cos, pero hende ta pretende cu nan por sconde cos pa Dios, pero dilanti di Dios ningun hende
tin bida priva, tur hende su asunto ta habri dilanti di Dios. Pesey Dios ta spera di nos tur e respet pa Su
palabra y Su presencia.
Tur palabra di Dios, ta puro,e ta un escudo pa esnan cu ta tuma refugio den dj’E. No anadi na su
palabranan pa E no reprende bo y bo wordo proba di ta un ganjado.( Proverbionan 30-5-6).
Mi ta testifica na tur esnan cu ta tende e palabranan di e profecia di e buki aki: si un hende anadi na
nan, Dios lo anadi na dje e plaganan cu ta para scirbi den e buki aki,y si un hende kita for di e
palabranan di e buki di e profesia aki, Dios lo kita su parti for di e palo di bida,y for di e stad santo,
cual nan ta para scirbi den e buki aki.( Revelacion of Apocalipsis 22:18-19).
Ma sea cumplidonan di e palabra y no solamente tendedornan cu ta ganja nan mes.( Santiago 1:22)
Un hende cu ta tende e palabra di Dios, y ta respeta, reconoce, e palabra di Dios ta un hende sabi,
pasobra e lo no trompica, pasobra Dios ta cune.
Un hende cu ta tende e palabra di Dios y ta haci manera e kier enbes di obedece ta carga e
consecuencia pa su mes.( Romanonan 2:5).
No tin ningun criatura scondi pa Su bista, ma tur costa habri y visto dilanti di wowo di Esun cu nos tin
haber cun’E.(Hebreonan 4:13).
Laga nos respeta Dios su palabra y reconoce su presencia, tur momento.
Sinceramente, Pastor Marcel Balootje.