Den un entrevista exclusivo, e artista multi-talentoso Bryan Maria, miho conoci den e mundo musical como ‘Black Joker’, a comparti su trayectorio desde su comienso den Caribe te cu su exito actual na Hulanda. Cu un carera cu a cuminsa resona fuertemente na Aruba na final di añanan 90, Maria awor ta den un etapa di innovacion constante, marcando pauta cu su reto personal di lansa un cancion cada luna durante aña 2026.
Bryan Maria, naci na Corsou pero lanta na Boneiro, a muda pa Hulanda na aña 1999 cu un meta cla: progresa den su talento musical. Durante su prome añanan na Europa, el a colabora cu e grupo Caliber, locual a habri portanan pa su desaroyo como productor. Awendia, Maria no solamente ta interpreta, sino cu e ta conta cu su propio studio di grabacion y un certificado profesional como productor musical.
Aruba: E base di su exito Reflexionando riba su comienso , e artista a recorda cu Aruba tabata e luga caminda su prome “luz” a sende. Entre añanan 1997 y 1998, su cancion “Biba Laga Mi Biba (Mal Fama Tambe ta Fama)” a bira un hit nacional, resonando den tur radio y presentacionnan grandi na Holiday Inn Ballroom hunto cu agrupacionnan manera Basic One y BMW. E exito aki a sirbi como e impulso fundamental pa su carera internacional.
E reto di 2026 y e fenomeno viral Actualmente, Bryan Maria ta den un ritmo di trabou intensivo. Pa e aña aki, el a impone un reto riba su mes di lansa un cancion nobo tur luna riba plataformanan digital manera Spotify y iTunes. Entre su lansamento nan mas recien tin “Hale Pa Mi”, “Vum Vum Original”, “Pelicula” y su ultimo estreno den luna di mei titula “Badam”.
Un di su sorpresanan mas grandi tabata e aceptacion di un Bachata na Papiamento, un proyecto cu a nace como un broma riba TikTok. “E tabata un kick, mi a grab’e djis pa fun riba TikTok y el a bay viral,”. E demanda tabata asina halto cu radioemisornan na Corsou, manera Radio Mas, a solicita e version completo, locual a bira un exito rotundo den henter e region.
Mensahe pa hubentud Cerrando e entrevista, e artista a manda un mensahe di speransa y determinacion pa e generacion nobo. “Biba positivo y lo bo logra cosnan positivo den bo bida,” Bryan Maria ‘Black Joker’ a declara, resaltando cu e actitud ey ta e clave pa cualkier exito personal y profesional.
Cu un catalogo musical cu ta sigui crece y un vision cla riba e industria moderno, Bryan Maria ta demostra cu e conexion entre e islanan y e conexion na Hulanda ta mas bibo cu nunca pa medio di musica.
