Un carta oficial cu a wordo manda riba 9 di juni 2026 pa Prome Minister Mike Eman door di ecoloog y Directora di IDNOVA, Oriana Wouters MSc., te asina leu no a ricibi ningun contesta di parti di e mandatario. Den e misiva, Wouters ta lansa un yamada urgente y structural pa pone ley di medio ambiente, derechonan di naturalesa y desaroyo di conocemento local central den e maneho di naturalesa na Aruba.
A pesar cu Gabinete Eman ta den funcion pa mas di un aña caba, e pasonan concreto riba tereno legislativo structural ta keda ausente, locual a lanta preocupacion serio cerca expertonan den e sector.
Alerta pa “negligencia gubernamental”
Den e carta, Oriana Wouters ta expresa su aprecio pa e proyectonan visibel cu Prome Minister Eman a bin ta asimila manera e colaboracion cu Wageningen University & Research (WUR), proyectonan y e plan nan pa e tereno di e ex-refineria. Sinembargo, e ta enfatisa cu naturalesa di Aruba no por depende unicamente di plantamento di palo y proyectonan corisante.
Un minister por planta un palo y cu esey transmiti speransa. Pero e mesun minister ey tin e deber di percura cu ta bini leynan cu ta preveni cu ecosistemanan ta sigui disparce,” Wouters a formula den su texto. E ta adverti cu si e conceptonan di ley existente keda sin wordo aproba, esaki no por wordo mira mas como un simpel tardansa, sino como un forma di negligencia gubernamental (bestuurlijke nalatigheid) contra naturalesa di Aruba y su futuro generacionnan.
Falta di fundeshi legal y modernisacion
Segun e directora di IDNOVA, Aruba ta carece totalmente di un fundeshi legal y democratico solido pa proteccion di medio ambiente. E leynan vigente actual, manera e Natuurbeschermingsverordening di 1995 y e Beschermde soortenlijst di 2017, ta bieu y no ta cuadra mas cu modelonan moderno di maneho internacional, manera esnan di IUCN.
Actualmente structuralmente ta falta normanan di calidad pa nos awa, tera, aire, zonanan na costa y ecosistemanan marino. Wouters ta subraya cu e presion regulado a base di recreacion, trafico di boto, benta di tereno, combina cu e problematica serio di awa di riool (afvalwater) y un control debil (zwakke handhaving), ta afectando areanan vulnerabel manera Mangel Halto, Baby Beach y partinan di e costa west directamente.
E ecoloog ta recorda Prome Minister Eman cu tin varios concepto di ley crucial ta drumi den lachi pa añanan largo:
- Wet milieubeheer (desde 2012)
- Waterwet (desde 2017)
- Afvalverordening (desde 2019)
- MER-verordening (desde 2019)
Ademas, e derecho riba un medio ambiente limpi, saludabel y sostenibel, hunto cu e derechonan di naturalesa mes, mester wordo ancora den nos Statuto/Constitucion (Grondwet) como derecho humano fundamental bou di EVRM.
Tres pregunta clave sin contesta
Wouters a exigi den su carta pa Prome Minister Mike Eman duna claridad publicamente riba tres punto central prome cu e periodo di gobernacion aki termina (y dentro un plaso di maximo dos aña):
- Cual di e conceptonan di ley existente (pa maneho di medio ambiente, awa, sushi, awa di riool, substancianan peligroso y MER) lo wordo actualisa y presenta formalmente na Parlamento di Aruba e kabinet aki?
- Kico ta e status di e propuesta pa ancora derechonan di naturalesa y e derecho riba un medio ambiente sano den Grondwet, y si e gobierno actual lo sigui cu e trayecto aki?
- Con e gobierno lo garantisa cu e maneho di naturalesa incluyendo e meta di 30×30, colaboracion cu WUR, restauracion di coral, y posibel exploracion di gas y petroleo lo wordo basa riba data local confiabel y un fortificacion di instancianan di conocemento Arubiano?
Un yamada na liderazgo
E carta ta conclui indicando cu, maske Gabinete AVP-FUTURO no por wordo teni responsabel pa tur e fayonan y falta di pasonan di e decadanan pasa, e ta responsabel si e scoge pa sigui mantene e mesun situacion sin cambio.
Considerando cu esaki lo por ta e ultimo termino di prome Minister Mike Eman como Prome Minister di Aruba, IDNOVA ta pidi e mandatario pa demostra un liderazgo cu no solamente ta “inspira”, sino uno cu ta “structura” y laga un legado legal compatibel pa e pais. Te cu publicacion di e articulo aki, oficina di Prome Minister no a emiti ningun reaccion oficial structural riba e peticion legal y ecologico aki. Te ainda no a contesta e carta cu a wordo manda pa nan.
Click pa lesa e PDF