Esaki ta bo placa, bo futuro, y awo e ta sin garantia.
Cada florin cu gobierno ta inverti, ta florin di belasting cu abo a paga. Bo tin derecho pa sa kico ta pasa cu e placa, ken ta responsabel pa e placa, y kico ta pasa si cos bay robes. E Landsverordening Algemeen Investerings- en Ontwikkelingsfonds, crioyamente yama e Fondo di Inversion, cu a keda aproba e siman aki, no ta duna bo ningun di eseynan. Esaki ta exactamente e motibo pakico Fraccion di MEP no por a apoya e ley den su forma actual.
E idea ta bon. E ehecucion ta malo.
Fraccion di MEP ta reconoce cu un fondo di inversion ta un instrumento necesario. Den practica, gobiernonan structuralmente ta perde recurso publico: si un proyecto aproba no inicia den e mesun aña presupuestario, e fondonan ta vence y ta wordo destina pa otro cos, frecuentemente pa paga debe. Un fondo special pa preserva e recursonan aki tin sentido. E problema no ta e concepto. E problema ta con e ley aki a wordo construi.
Kico Raad van Advies y Rekenkamer a bisa
Raad van Advies (RvA) a conclui cu e propuesta di Minister Wever falta un structura di gobernacion solido. E texto no ta stipula cu claridad ken ta responsabel, ki momento mester rindi cuenta, ni con Parlamento por eherce su rol di control. E advertencia di RvA tabata duidelijk: e ley den su forma actual no ta cuadra cu e normanan di bon gobernacion.
Algemene Rekenkamer a bay mas leu. Den su rapport “Buiten beeld, buiten controle”, ARA a ilustra e erornan di pasado den 13 fondonan cu a wordo lanta den historia di Aruba, y a recomenda formalmente cu Minister Wever introduci e cambionan necesario via un Nota di Cambio, prome cu e ley wordo aproba. Gobierno lastimamente no a haci esaki y e 11 nan di coalicion den parlamento lastimamente no a exigi esaki tampoco.
E koppeling cu HOFA
Den e Memorie van Toelichting, Minister Wever a inclui un facilidad di fiansa cu ta ancra den e Rijkswet HOFA, un instrumento cu legalmente ainda no ta existi. Fraccion di MEP ta haya e inclusion aki legalmente cuestionabel: con bo por ancra algo den ley cu legalmente ainda no ta existi? Adicionalmente, e ley ta stipula cu minister lo comparti informacion financiero cu CAft. Pero Aruba tin e Landsverordening Aruba financieel toezicht (LAft) desde 2015, cu ya ta duna CAft tur e hermentnan legal necesario pa haya e informacion ey. Si LAft a regla esaki caba desde 2015, e pregunta ta: pakico gobierno ta ripiti esaki den un ley nobo?
E resultado
Gobierno a haya e conseho di dos organo independiente. Como respuesta, gobierno a introduci un Nota di Cambio cu un mecanismo di control minimo. E cambio aki no ta captura tur loke Algemene Rekenkamer a recomenda pa garantisa transparencia real y bon gobernacion.
Gobierno y mayoria di coalicion den parlamento a scoge conscientemente pa no sigui e consehonan. Fraccion di MEP no por apoya un ley cu, despues di tur e advertencianan, ainda no ta cumpli cu e standardnan basico di transparencia y ‘accountability’ cu pueblo di Aruba merece. Un pleister riba un herida cu mester cirugia no ta tratamento. Ta cosmetica.
E pueblo di Aruba merece inversion real, cu reglanan real, unda transparencia y bon gobernacion ta real. No e fondo aki.