Venezuela por wordo compara cu nos balcon, nan ta keda hopi serca di nos, nos por lanta mainta y cu bon weer, mira e sero na Punto Fijo, nos hendenan a yega di landa di ayanan pa aki nan, y tin biaha bo ta pensa cu mescos cu hende a landa bini , hende por landa bay, pasobra e distancia ta cortico aunke e laman por ta hopi peligroso.
Diarazon 24-6-2026 a sosode algo teribel na Venezuela cu a destrui un parti di e pais den 35 seconde, un teremoto a dal Venezuela, ningun hende sa ki dia un teremoto lo tuma lugar, semper e ta bini di sorpresa, y ta despues hende por bisa cuanto danjo e a haci.
Nos no por tapa solo cu un dede:
Venezuela ta bini pa hopi anja y ta wordo dirigi pa un gobierno fuerte y ora tin un tipo di gobierno asina e ta wordo yama mundialmente un regimen,
Caminda na prome lugar e pueblo ta sufri,
E pueblo ta cay den decadencia,
Probresa ta reina y inseguridad ta crece,
E situacion politico a bira dificil , teniendo hopi preso politico, y miyones a bandona nan hogar.
Buscando refugio y bienestar den otro pais, hopi a perde nan bida crusando frontera , drenta otro pais, drenta mondi grandi caminda nan no a sali cu bida, hopi famia dividi, hopi mucha cu no a lanta cu nan mayornan, den un palabra bisa Venezuela a bin ta pasa y ta pasando den un dolor inmenso.
Ta nos bisinja, y nos tin cu yama Dios danki, y nos tin cu pidi Dios tene misericordia di nos, pasobra con cu bo mire, hopi ta papia cientificamente, y di sismologia, pero si e man di Dios no a interveni na nos fabor , awe lo ta otro cantica pa nos, pasobra e distancia cu Aruba, Bonaire y Curacao ta keda for di Venezuela ta hopi chikito,
Nos mester reconoce cu ta Dios Todopoderoso mes a spaar nos, nos no por keda bisa Aruba ta bendiciona, pasobra tur pais ta bendiciona, pero comportacion di e gobierno ta cambia ruta di un pais.( 1 Timoteo 2:1-2). pero nos tin cu para keto un rato y bisa:
Senjor danki pa Bo gran misericordia y Bo gran amor, pasobra un teremoto di e magnitud ey nos no tin forsa pa resisti.
Pesey nos ta pidi henter pueblo di Aruba y Caribe Hulandes pa sigi haci oracion pa Venezuela, pasobra mundo henter ta yudando Venezuela, aunke hasta den e ayudo aki ta parce cu internamente tin iregularidad ta sosode cu nos ta spera cu ta fake news pasobra e cosnan ey ta duro pa splica y acepta.
Cuminda ta yegando for di henter mundo, remedi ta yegando for di henter mundo, y no for di cierto pais so, esun cu no ta manda algo grandi a manda manera nan por alcansa.
Pero tin dolor cu nos tur sa cu nos mester pidi Papa Dios ayudo.
Perdida di ser keri, caminda un hende a mira famia ora e temblor a cuminsa, pero te awe 1-7-2026 e no sa nada mas di nan.
Otronan ta lanta mainta y mira e desaster pero no por alcansa esnan cu ta bao di e derumbe.
Oracion pa Dios tene misericordia y mustra e socoristanan na unda na por hanja y saca e hende nan.
Palabra di consuelo nos tin pa e pueblo Venezolano, pasobra tin miles bibando mey mey di nos, y nan ta nos ruman:
Isaias 41:13 ta bisa: Pasobra Ami ta Senjor bo Dios, kende ta sostene bo man drechi Kende ta bisabo, no tene miedo , lo Mi yudabo.
Sinceramente, Pastor Marcel Balootje.