ColombiaFeatured

Frakshon PNP ta ekspresá profundo solidaridat ku e pueblo Colombiano tras di teremoto devastador

Colombiaquake 00

Frakshon di Partido Nashonal di Pueblo (PNP) a tuma nota ku inmenso tristesa di e teremoto fuerte ku a asotá nos pais bisiña, Colombia, lagando destrukshon atras i fòrsando outoridatnan pa deklará un estado di desaster nashonal. Den e momentunan aki, nos pensamentu i orashonnan ta ku tur esnan ku a pèrdè ser kerí, esnan ku ta heridá, i tur ku a pèrdè nan kas.

Kòrsou i Colombia ta kompartí un laso estrecho di komèrsio, turismo, médiko, historia, kultura, i lasonan familiar fuerte. Na Kòrsou, nos tin un komunidat grandi di rumannan Colombiano ku diariamente ta traha duru i ta kontribuí na e desaroyo di nos pais. Na e momentunan aki, nan preokupashon i nan doló nos ta komparti.

Komo un partido ankrá den e prinsipionan di demokrasia kristian, PNP ta karga e balor di bienestar komun. Solidaridat no konosé frontera, meskos ku serka nos rumannan di Venezuela. Ora un pais bisiña i ruman ta pasa den un krísis asina grandi, nos komo Yu di Kòrsou mester mustra nos grandesa, empatia i humanidat.

Frakshon PNP ta pidi e pueblo di Kòrsou pa tene e pueblo di Colombia den nan orashonnan i ta urgi nos komunidat pa sostené inisiativanan humanitario ku lo por lanta pa manda yudansa pa e áreanan afektá.

Nos ta spera ku forsa, kurashi i union lo guia e pueblo Colombiano den e proseso difísil di rekonstrukshon. Kòrsou ta para huntu ku Colombia.

Related posts

Pisina flotante na parke tului ta será for di 3 te 6 di yüni pa kita koral pikapika

EA News Author

Control mara na e Ley di financiamento di partidonan politico ainda pueblo no a haya resultado si tur cos a cana corecto

EA News Author

Minister Dowers a lansa Taxi.aw: Un plataforma oficial di Gobierno pa tarifanan di Taxi

EA News Author

Leave a Comment

Whatsapp Message