E cifranan di turismo di juli 2026 ta mustra kico ta pasa ora un isla di cual 50% di PIB (producto interior bruto) ta depende di turismo, no tin un strategia economico coherente. Boneiro tin un vision turistico riba papel. Loke falta ta un plan cu ta conecta e vision ey cu conexion aereo, capacidad, mercado y creacion di balor economico.
Na juli 2026 Boneiro a ricibi 669 turista di estadia menos cu juli 2025. Riba papel esey ta representa un bahada di 4 porshento. Pero tras di e cifra ey ta sconde un historia mucho mas amplio. Tres luna tras di otro e mercado nort Americano ta baha cu maso of menos 12 porshento. Esey ta hustamente e mercado cu ta gasta mas pa bishitante. Y ta hustamente e mercado pa cual ta carga un rol prominente den e vision turistico di Boneiro.
E problema no ta cu no tin vision. E problema ta cu no tin un plan economico pa realisa esaki.
Un vision sin plan
Plan Strategico di Turismo 2017-2027 ta scoge pa turismo di balor halto. No mas bishitante, sino bishitante cu ta aporta mas balor economico. Esey ta zona bon cla. Pero un vision no ta un plan. Un plan ta contesta e preguntanan cu un vision ta laga habri.
Cua medida concreto ta tuma pa reestablece e conexion aereo nort Americano? Ken ta responsabel pa maneho di e capacidad di acomodacion relaciona cu e cambio di demanda? Cuanto di e impuesto di turista, anualmente mas of menos $16 miyon, ta uza di manera demostrabel pa fortificacion di e economia turistico? Ken ta supervisa e coherencia entre conexion aereo, mercado, grado di ocupacion y balor economico?
Pa ningun di e preguntanan aki no tin un contesta cla y publico. Esey ta e plan cu falta.
Loke cifranan ta mustra
Na juli e mercado nort Americano a baha pa di tres luna consecutivo cu mas o menos 12 porshento. Merca: di 4.565 pa 4.044 bishitante (-11,4%). Canada: -35,6%. Corsou, e mercado regional mas grandi: -10,3%. Hulanda: -1,8%.
E tres mercadonan mas grandi hunto a registra 877 bishitante menos cu e aña anterior. Un bahada di 6,1 porshento. Crecemento for di Alemania, Brazil y Suisa ta positivo, pero no ta compensa e perdidanan for di e mercadonan principal.
DATONAN CLAVE DI TCB JULI 2026 (PROVISHONAL)
Turistanan di estadia: 15.984 (vs 16.653 na 2025, -4%)
• MERKA: 4.044 (vs 4.565, -11,4%)
• Canada: -35,6%
• Corsou: -10,3%
• Hulanda: -1,8%
• Tres mercadonan mas grandi hunto: -6,1%
E cuenta economico
Turismo ta representa mas of menos 50 porshento di e PIB di Boneiro, 53 porshento di empleo y 44 porshento di entrada di impuesto local. Alrededor di 7.200 empleo ta depende directamente of indirectamente di turismo. Turismo no ta un sector banda di economia di Boneiro. Turismo ta economia di Boneiro.
E estudio di impacto di Economisch Bureau Amsterdam ta mustra cu un bishitante Merca ta gasta un promedio di $2.673 pa estadia. Un bishitante Hulandes $2.450. Un bishitante di Caribe Hulandes $1.180.
E 521 menos bishitantenan Mericano na juli ta representa alrededor di $1,39 miyon na potencial gasto directo perdi. E 136 menos bishitantenan Hulandes, aproximadamente $333.000. E 220 bishitantenan menos for di Corsou, alrededor di $260.000. Den un luna, e tres mercadonan aki ta responsabel pa casi $2 miyon menos na potencial gasto directo.
Cu esey, juni y juli hunto ta representa un perdida acumulativo di potencial gasto directo cu ta bay den direccion di $4 miyon. Cada luna cu no interveni structuralmente, e montante ey ta sigui subi.
E cifranan ey ta traduci directamente den menos entrada pa restaurant, centro di buseo, pacus, companianan di huur auto y suministrado. Y via entrada di impuesto tambe den menos recurso pa servicionan publico. Turismo ta loke ta pone sen den caha y asina paga pa tur otro cos.
Loke falta
Boneiro no tin un plan economico coherente pa turismo. No tin un instancia cu ta maneha e conexion entre conexion aereo, capacidad di acomodacion, mercado y creacion di balor economico. No tin transparencia con ta uza e impuesto di turista. No tin contesta riba e pregunta con ta reestablece structuralmente e mercado di merca cu ta bahando.
Mientrastanto cu e cantidad di acomodacion ta crece, e demanda ta baha. E conexion entre Corsou – Boneiro ta confronta structuralmente cu cantidad limita di asiento y tarifanan di ida y buelta di $250 or mas pa un vuelo di menos cu mei ora. Boneiro ta drenta su di tres aña consecutivo cu recursonan limita pa promocion di destino, mientrastanto cu destinacionnan competido ta sigui inverti.
Maneho social ta importante. Pero ambicion social no ta sostenibel sin un base economico solido cu ta financia esaki. Economia no ta un asunto secundario. E ta e fundeshi.
Boneiro ta trata su economia como algo cu ta bay di su mes. Esey ta un eror cu ta traduci su mes caba den e cifranan cuantifikabel di juni y juli den desena di miyon na balor economico perdi pa aña.
Loke BONHATA ta pidi
BONHATA ta haci un yamada na gobierno y tur partido envolvi pa tuma cuater paso concreto
• Na prome luga: traha un plan economico coherente pa turismo di Boneiru. No un vision, sino un plan cu obhetivo, responsabilidad y recurso concreto.
• Na di dos luga: reestablece e conexionnan aereo cu Merca. Esaki ta rekeri coordinacion activo, inversion y colaboracion entre gobierno, BIA y TCB.
• Na di tres luga: haci e conexion Corsou – Boneiro pagabel y disponibel. Recientemente Tweede Kamer a crea e posibilidad pa interveni den caso cu e conexionnan na Caribe Hulandes no ta suficiente of pagabel. Tin cu probecha di e posibilidad aki.
• Na di cuater luga: sea transparente cu uzo di e impuesto di turista. Mester uza e montante di mas o menos $16 miyon cu anualmente ta cobra, di manera demostrabel pa fortificacion di e economia turistico pa cual ta su intencion tambe.
Boneiro no mester simplemente ricibi mas turista. Mester percura cu e economia turistico existente ta funciona di manera sano y cu cada bishita ta aporta cu mas valor posibel. Esey ta rekeri maneho cu ta tuma economia na serio, no como algo secundario, sino como fundeshi di tur loke Boneiro kier ta.